قيرميزي باليق

:قيرميزي باليق

گونتای گنجالپ

اون بير مين دوققوز يوز دوخسان دوققوز کيچيک باليق: " سنين ده گئجن خئييره قالسين ننه " - سؤيله ييب ياتديلار. ننه باليق دا ياتدي. آنجاق قيرميزي باليق نه قدر چاليشديسا ياتا بيلمه دي. يوخوسو گلميردي. او، سحره ده ک دنيز عشقي ايله يئرينده چابالاييب دوردو. يالنيز بير شئي دوشونوردو: دنيز...

(بئهرنگي نين " قاراجا باليق " اثري نين سونو)

***

قيرميزي باليق گونلرجه اؤزونه دالغين بير شکيلده دولاشيردي. بعضن اوندان سورولان سورولارا دا جاواب وئرميردي. سانکي ائشيتميردي. آرخاداشلاري اونون قولاقلارينین آغیرلاشدیغینی سانيرديلار. ننه سيندن ائشيتديگي ناغيل بوتون وارليغيني ائتکيله ميشدي. دنيز دوشونجه سي، دنيز خيالی گلميش بوتون روحونو ايشغال ائتميشدي. بؤيوک دالغالارين قوينوندا ياشايان قاراجا باليغي دوشونوردو. « گئرچکدن قاراجا باليغين سونو نئجه اولدو؟ ناققانين قارنيندان چيخا بيلميشمي؟» - دئيه اؤز-اؤزونه دوشونوردو. يولا دوشوب گئديب دنيزده قاراجا باليغي تاپماق ايسته ييردي. آنجاق ياشاديغي موحيطين خاطيره لريندن ده آيريلماق ايستميردي. بير طرفده دنيز دوشونجه سي اونو چاغيريردي، ديگر طرفدن يوردوندان آيريلماق زور گليردي. آنجاق گونلر کئچديکجه، دنيز دوشونجه سي داها دا چکيجي گؤرونوردو. قيرميزي باليق قراريني وئرميشدي. «يولا دوشمه لي يم. موطلق يولا دوشوب گئديب قاراجا باليغي تاپمالييام. آنجاق قاراجا باليغين راستلانديغي تهلوکه لري اورتادان قالديرمام اوچون ساواش تئکنيگيني اؤيرنمه لي يم» - دئيه اؤز-اؤزونه دوشونوردو.

بير گون گوندوغارکن ننه باليق اوشاقلاريني يوخودان اوياتدي. قيرميزي باليق اويانيق ايدي. ننه باليغا: « ننه جان، من بو گون يولا دوشوب گئتمه لي يم. گئديب دنيزده قاراجا باليغي تاپمالييام. آنلاتديغين قاراجا باليق ماجراسي و دنيز سئوداسي روحومو سارميشدير. لوطفا ننه جان، بوتون باليقلاري توپلا، دوست- تانيشلاري توپلا. بير ويداع قونوشماسي ائده جم.» - دئدي.

ننه باليق: اوغلوم، سنين بؤيوک دويغولارين، دوشونجه لرين حئيراني اولدوغونو بيليرم. اصلینده سنين بو يولچولوغونو چوخ ايسترديم. آنجاق سن ده قاراجا باليق کيمي بير دفعه ليک گئتمه! گئت و دنيزدن بيزلره ده خبر گتير. دنيزده ايليشيب قالما! بؤيوک دالغالارين قوينوندا ساقين يوردونو اونوتما! قاراجا باليغي دا تاپ اؤزونله گتير. دنيزدن بيزه يئني دويغولار گتيرين. يالنيز اؤز موتلولوغونوزو دوشونمه یين! ائله بير ايش گؤرون کي، بيزيم دنيزله ايليشکيميز اولوسون.

قيرميزي باليق: ننه جان، سنين سؤيله ديکلريني اونوتماياجام. دنيزه قوووشدوقدان سونرا قاراجا باليغي دا تاپيب اونونلا بير يئرده موطلق گئري دؤنه جم. مني بو يولچولوغومدا آلقيشلاديغين اوچون چوخ ساغ اول ننه. اينان کي، سنين دئديکلريني هئچ بير زامان اونوتماياجام.

ننه باليق: هاميميز اؤلومه محکوموق. آنجاق سن بو سفرينله يئني بير يولا گيره جکسن. اؤلمز اولا بيلرسن. سندن آيري قالماق چتيندير. سني چوخ اؤزله يه جه یيک. سنين اوچون گؤز ياشلاري دا تؤکه جه یم. آنجاق سنين ابدي اولاراق تاريخده قالمان و بوتون باليقلار اوچون اؤرنک اولمان بيزيم کدريميزدن اوستوندور. بو اوزدن ده سنه اوغورلار ديله ييرم. يولون آچيق اولسون. بير آز گؤزله باليقلاري توپلاييم، هاميسي ايله ويداعلاش. قاراجا باليغين دا آناسي چوخ ياشلانميش آرتيق. قاراجا باليغين يولونو گؤزله مکدن گؤزلري توتولموش زاواللي نين. اونونلا دا گؤروش.

ننه باليق بوتون باليقلاري بير يئره توپلادي و اونلارا: «قيرميزي باليق دنيز يولچولوغونا چيخير. سيزينله حالاللاشماق ايسته يير. اونا قولاق آسمانيزي ايسته ييرم.» - دئدي.

قيرميزي باليق: عزيز آنالار، آتالار، باجيلار و قارداشلار! بؤيوک بير يولچولوغا چيخيرام. دنيز يولچولوغونا. بير يئرده ياشاديغيميز موددت ايچينده مندن بير يانليش داورانيش و خطا گؤرموشسونوزسه، مني باغيشلامانيزي ريجا ائديرم. سيزلري اونوتماياجاغام. منه دوعا ائدين کي، بو چتين يولچولوقدا باشاريلي اولوم. سيزلرين خئيير- دوعالارينيزا احتيياجيم وار. منيم بو يولچولوغوم، سادجه اؤزوم اوچون دئييلدير، هم ده سيزلر اوچوندور. بيليرسينيز کي، مندن اؤنجه قاراجا باليق بو يولچولوغا چيخميش، آنجاق گئري دؤنمه ميشدير. دنيزه وارديغيم زامان قاراجا باليغي تاپيب اونونلا گئري دؤنه جه یم.

بو زامان باليقلارين ايچيندن ياشلي بير باليغين آغلاما سسي ائشيديلدي. قاراجا باليغين آناسي نين سسي ايدي. بالاسي نين آديني دويار- دويماز آغلاماغا باشلاميشدي. قيرميزي باليق، قاراجا باليغين آناسينا ياخينلاشيب دئدي: خانيم، لوطفا آغلامايين. سيزين آناليق دويغولارينيزي آنلاييرام. بيليرم قاراجا باليغين حصرتينده چوخ اذييتلر چکميشسينيز. آنجاق بونو دا بيلميش اولون کي، قاراجا باليغين آناسي اولدوغونوز اوچون غورور دويماليسينيز. قاراجا باليق بؤيوک بير آماج اوچون دونيايا گلميشدير. بو گون هر بير باليق اونون خياللاريني، آزادليق نيتلريني پايلاشماقدادير. يوخسول موحيطلرده ياشايان باليقلارين دوشونجه سينده و داورانيشلاريندا دئوريم گئرچکلشديرميش اولان قاراجا باليغين يالنيز اؤزو اوچون ياشاماسينا اينانماق زوردور. بلکه ده باشينا بير ايش گلميشدير. اونو تاپيب سيزه گئري گتيره جگيمه سؤز وئريرم.

قاراجا باليغين آناسي قيرميزي باليغي قوجالاييب و قولاغينا سؤيله دي: قاراجا باليق گئري گلنه قدر بلکه من اؤلدوم. آنجاق اونو گؤرسن دئيرسن کي، مني باغيشلاسين. يولا دوشدويونده اونو اينجيتديک. بوتون بونلار منيم آناليق دويغولاريمدان قايناقلانميشدي. اونو اينجيتمک فيکريم يوخ ايدي.

قيرميزي باليق: سيزي آنلاييرام. آنجاق قاراجا باليغين سيزي باغيشلاماسي فيکري دوغرو دئييلدير. آنالارين دا حاقلي اولدوقلاري يئرلر وار. ندنسه ايچيمده قاراجا باليغين ياشاديغي اوميدي وار. بلکه اونون يارديما احتيياجي وار. امين اولون کي، قاراجا باليغي تاپيب سيزين اوچون گئري گتيره جه یم.

قيرميزي باليق بوتون باليقلارلا ساريليب گؤروشدو. بير نئچه باليق اونو چاغلايانا* قدر اوغورلاديلار. بو چاغلايان قاراجا باليغين گئتديگي يولچولوغون باشلانقيجي ايدي. قاراجا باليق بوردان، بو يوکسکليکدن اؤزون آتميشدي دنيز يولچولوغو ماجرالارينا. قيرميزي باليق بو چاغلاياندان اؤزونو درينلييه طرف آتدي. سانکي قاراجا باليغين باشينا گلنلري ازبرله ميشجه سينه داورانيردي. نلرله راستلاناجاغيني اؤنجه دن بيليردي. چاغلاياندان تؤکوله رک دره ده بيريکن سويون بوللوغو قيرميزي باليغي قيسا سوره ليگينه اوغراشديردي. داها سونرا اؤزونو توپارلاييب سويون آخيشيندا سوزمه يه داوام ائتدي. سو بير يئرده آرخين قارشي ديوارينا دگيب سولا بورخولوردو. بورادا سويون آخيم سورعتي آزالديغيندان بعضي جانليلار سويون ايچينده ياشاييردي. قيرميزي باليق قورباغانين بالالاری اولان چؤمچه باليقلاري بوردا گؤردو. قورباغا ايله قاراجا باليغين آراسينداکي آنلاشمازليغي بيليردي. آنجاق قيرميزي باليق قورباغا ايله تانيش اولوب اوندان چوخ اؤنملي بير سيرري اؤيرنمک ايسته ييردي. قيرميزي باليق قورباغانين هم سويون ايچينده هم ده سويون ديشيندا نئجه ياشاديغيني اؤيرنمک ايسته ييردي. قيرميزي باليق تهلوکه لي يولچولوغوندا بو ايکي موحيطده ياشايا بيلمه سيرريني اؤيرنمگي چوخ اؤنمسه ييردي. «هر احتيمالا گؤره سويون ديشينا چيخا و يا چيخاريلا بيلرم.» — دئيه اؤز- اؤزونه دوشونوردو. قيرميزي باليغي گؤرن چؤمچه باليقلار اونون باشينا ييغيشيب «آهاا، يئني بير باليق گلدي. بو دا قيرميزي باليق! سن داها کيمسن، هاردان گليب هارا گئديرسن؟» - دئديلر.

قيرميزي باليق: من چوخ اوزاقلاردان گليرم و دنيزي آختارماغا گئديرم.

چؤمچه باليقلارين هاميسي بيردن گولوشوب «هاهاهاها، بو دا قاراجا باليق کيمي دنيز آختاريشيندادير.» — دئديلر و اونلاردان بيري داوام ائتدي: اوشاقلار، يادينيزدامي رحمتليک ننه ميز بير قاراجا باليق حاققیندا دانيشاردي؟

بير باشقاسي: هه، هه. ياديميزدادير. حتّی رحمتليک ننه ميزي ده آشاغيلاميشدیر او قاراجا دئييلن باليق.

بير باشقاسي: آخ اونو بير اليمه کئچيرسه يديم.

قيرميزي باليق: دگرلي آرخاداشلار، من قاراجا باليغين سيزين مرحوم ننه نيزي آشاغيلاديغينا اينانميرام. بلکه سيزه يانليش بيلگي وئرميشلر. چونکو قاراجا باليغين دونیاگؤروشونده آشاغيلاما دئیه بیر شئی اولا بيلمزدي.

بير باشقا چؤمچه باليق: يعني سن دئييرسن کي، بيزيم رحمتليک ننه ميز يالانچي اولموش؟

چؤمچه باليغين بو سؤزو ديگرلريني تحريک ائتدي. هاميسي بير سسله «سن ده او قاراجا باليغين سويوندانسان. قاراجا باليغين مرحوم ننه ميزي آشاغيلاماسي نين دا اينتيقاميني سندن آلماليييق»— دئديلر.

بو زامان آرخين کناريندان بير سؤيود آغاجي نين قوروموش بوداغي قيريليب چؤمچه باليقلارين اوستونه دوشدو. چؤمچه باليقلار پرن- پرن داغيلديلار. بير نئچه سي بوداغين آلتيندا قالدي. تام بو زامان دا بير قورباغا قورولدايا- قورولدايا اؤزونو سويا آتيب بالالاريني قورتارماغا چاليشدي. قيرميزي باليق دا قورباغايا يارديم ائده رک، چؤمچه باليقلاري بوداغين آلتيندان چيخاريردي. چؤمچه باليقلاردان بير نئچه سي يارالانميشدي. آنجاق قيرميزي باليغين يارديمي اولماسايدي، اونلار اؤله جکديلر. چؤمچه باليقلار قيرميزي باليغين قارشيسيندا اوتانماغا باشلاميشديلار. بالالاری نین ياراسيني ديلي ايله يالاييب سيغاللايان قورباغا اوزونو قيرميزي باليغا توتوب: «يارديمين اوچون چوخ ساغ اول، يارديم ائتمه سه يدين بالالاریمی تکباشيما قورتارا بيلمزديم.» — دئدي.

قيرميزي باليق: قورباغا خانيم، بيزلر نه قدر يارديملاشساق حياتيميز بير او قدر گؤزل اولار. بو، منيم گؤرَويمدير. تشککوره گرک يوخ. بير حياتي قورتارمانين موتلولوغو منيم اوچون يئتر.

قورباغا: حاقليسان، حيات قورتارما دويغوسو چوخ گؤزلدير. سن هاردان گليرسن، هارا گئديرسن؟

بو زامان قويروغو يارالانميش چؤمچه باليقلاردان بيري «بو قاراجا باليغين دوستودور. بو دا چوخ اوزاقلاردان گليب دنيزه گئدير»— دئدي.

قورباغا بير آز اؤز-اؤزونه دوشونمه يه باشلادي و سونرا دا «دئمک قاراجا باليغين گئتديگي يوللا گئديرسن. قاراجا باليقلا منيم آنام آراسيندا بير آنلاشمازليق اولموش. آنجاق اونلار اسکيده قالمالي منجه. منيم بالالاريمين عاغلينا دنيز دوشونجه سيني سوخماسان سنه اليمدن گلن يارديمي ائدرم. بالالاريمين يانيمدان آيريلمالاريني ايستميرم. بالالاريمين قورتاريليشيندا امگين کئچديگي اوچون بوينوموزدا حاققين وار. سنه نئجه يارديم ائده بيلرم؟» — دئدي.

قيرميزي باليق: اصلینده سيزين يارديمينيزا احتيياجيم وار، قورباغا خانيم. سيز نئجه اولور هم قورودا، هم ده سودا ياشايا بيليرسينيز؟

قورباغا: بو چوخ چتين سوالدير. بيزيم ياراديليشيميز بئله دير. هم سودا هم ده قورودا ياشايابيلمه اؤزلليگيني طبيعت بيزه وئرميشدير. باليقلارين قورودا اوزون زامان ياشايا بيلمه لري چتيندير. آنجاق منيم بوينومدا سنين حاققين وار. سنه يارديمچي اولاجاغام. قورباغالارين بوغازلاري نين آلتيندا بير کيچيک تولوق وار. سويا گيرديگيميزده فعاللاشير. سودان کنارا چيخديغيميزدا او تولوغون ايچينده سو ساخلاماق مومکون اولور. مثلن آرخلار قورودوغوندا سوساديغيميز زامان تولوغوموزداکی سودان يارارلانيريق. من سنين بوغازي نين آلتينا بو کيچيک تولوغون بيريني کئچيره جه یم. منيم چوخ سئوديگيم بير باجيم اوچ گون اؤنجه اؤلموشدور. اؤلدويونده ده «منيم عوضولريمي ياشاماق ايسته ينلره باغيشلارسينيز»— دئميشدي. هم اونون وصييتي گئرچکلشر، هم ده بوينومدا اولان سيزين حاققینيزي اؤده ميش اولارام.

قورباغا بونو دئييب بير داشين آلتينا گيردي. اللرينده بير قورباغا بوغازي ايله گئري دؤندو. اوزونو قيرميزي باليغا توتوب «من ايندي بو قورباغا بوغازي نين آلتينداکي تولوغو سنين بوغازي نين آلتينا تيکه جه یم. بير آز آغريلي اولا بيلر. آنجاق دؤزمه ليسن. قيسا سوره ليگينه آغريسي کئچه جکدير.» — دئدي.

قيرميزي باليق: من بو کيچيک آغريلارا دؤزرم. يئتر کي، قورودا ياشايا بيلمه فورصتيني الده ائديم.

قورباغا: بعضن کئچيلر گليب بوردا سو ايچيرلر. بدنلري نين توکلري ايليشيب قالير داشدا، کولدا- کوسدا. من ايندي کئچي نين توکونو ساپلاياجام ساري تيکانا و بو تولوغو بوغازي نين آلتينا تيکه جم.

چؤمچه باليقلار آنالاري نين تيکيش عمليياتيني سئير ائديرديلر. خالالاري نين بوغازالتي تولوغونو آنالاري قيرميزي باليغين بوغازي نين آلتينا تيکيردي. قيرميزي باليق آغريلارا دؤزوردو و اؤز-اؤزونه «بو آغريلار کئچيجيدير. من هر موحيطده ياشاييب و آزادلغيمي قوروماغي، حياتيمي ساوونماغي باشارمالييام»— دئیه دوشونوردو.

تيکيش عمليياتي بيتميش و قيرميزي بالغين بوغازيندان بير نئچه داملا قان داملاميشدي. قيرميزي باليق قورباغايا مينتدارليغيني بيلديريب اونلاردان آيريلماق ايسته دي. چؤمچه باليقلار بير آغيزلا: «يولون آچيق اولسون قيرميزي باليق. بيزدن دنيزه سالام سؤيلرسن!» — دئديلر.

قيرميزي باليق يئني بير ايمکانا قوووشمانين غورورونو ياشاييردي. بوغازي نين آلتينداکي تولوغا چوخ تئز آليشدي. ايندي درحال يولا دوشوب و قيزبوغاني تاپمالي ايدي. اوندان هم قيلينج آلمالي، هم ده ساواش تئکنيگيني اؤيرنمه لي ايدي. قيزبوغانلا راستلانماسي چوخ چکمه دي. قيزبوغان قاراجا باليقلا راستلاندیغيندا بير داشين اوزرينده سَرَله نيب گونشله نيردي. ايندي ده عئيني دورومدا ايدي. داشين اوزرينه راحاتجا اوزانميش و گونشين ايشينلاري* بدنيني ايسيديردي. قيرميزي باليق قيزبوغاني گؤرَر-گؤرمز: «اؤزگور** باليقلارين دوستو قيزبوغانا سئوگيلر!» — دئدي. قيزبوغان اؤزونو بير آز توپارلاييب کيچيک آرخدا اوزَن قيرميزي باليغا باخدي. آياقلاري نين اوستونده دوروب بوغازيني داها ياخشي گؤرمک اوچون ايره لي یه آرخا طرف اوزاتدي. قيرميزي باليغي آرتيق ياخشيجا گؤره بيليردي. «سايقيلار قيرميزي باليق!» — سؤيله دي و داوام ائتدي: هارا گئديرسن قيرميزي باليق؟

قيرميزي باليق: قاراجا باليغي آختارماغا گئديرم. بيليرم کي، سيز اونا يارديمچي اولموشسونوز. لوطفا منه ده يارديمچي اولون. منه ده قيلينج وئرين. ساواش تئکنيگيني ده منه اؤيرتمه نيزي ريجا ائديرم.

قيزبوغان: آاااا، قاراجا باليق! خاطيرلاييرام. چوخ اوزاقلاردان گلميشدي. دنيزه گئتمه یي هدفله ميشدي. دوغروسو اوندان داها سونرا خبريم اولمادي. ياريم- يامالاق خبرلر ائشيتديم. يالنيز بيليرم کي، دنيزده باشينا چوخ بلالار گلميش. دورومو هئچ ده ياخشي دئييل.

قيرميزي باليق: قيزبوغان، من اونا يارديمچي اولماق ايسته ييرم. آنجاق بيليرم کي، يارديمچي اولماق آرزوسو يئترلي دئييل. من ساواش تئکنيکلريني ده اؤيرنمه لي يم. بيليرم کي، بو يولدا آنجاق سيز منه يارديمچي اولا بيلرسينيز.

قيزبوغان: او زامان قاراجا باليغين مدنييتيندن چوخ خوشلانميشديم. اونون آزادليق دوشونجه سيندن ده خوشلانميشديم. او اوزدن اونا يارديم ائتديم. ايندي آرتيق او گونون اوزريندن ايللر کئچميش. من ده ياشلانميشام. قاراجا باليق دا يقين کي، هم ياشلانميش، هم ده داها چوخ بيلگي و تجروبه قازانميشدير. دنيزده قازانيلان بيلگي و تجروبه ايله دار موحيطده قازانيلان بيلگي و تجروبه لرين فرقي اولور.

قيرميزي باليق: حاقليسينيز قيزبوغان. حرکتده اولماق عاغلين گؤزلريني آچير. من بو قيسا يولچولوغومدا اؤنملي بيلگيلر و تجروبه لر قازانديم. بونلاري بو يولچولوق و حرکت منه قازانديردي.

قيزبوغان: يولچولوق چوخ گؤزلدير. اوزاقلارا يولچولوغا چيخماق جسارت ايستر. آنجاق باشقالارينا يئم اولماماق اوچون بيلگي و ساواش تئکنيکلريني ده بيلمن لازيمدير. باليقلارين بير تک چتينليکلري سويون ديشيندا ياشايا بيلمه مه لريدير. بعضي تئکنيکلر گرک سويون ديشيندا اؤيره نيلسين.

قيرميزي باليق: حؤرمتلي قيزبوغان، سودان کناردا ياشاماق تئکنيگيني قورباغا منه اؤيرتميشدير. بير سوره ليگينه سويون ديشيندا ياشاماق ايمکانيم واردير.

قيزبوغان: آااا نه گؤزل! او زامان سن داها چوخ ساواش تئکنيکلري اؤيرنه بيلرسن. من اؤزوم ده آزادليق وورغونو اولدوغوم اوچون آزادليق يولوندا ساواشانلارا هر تور يارديم ائتمک ايسترم. قاراجا باليقدان سونرا منيم ده باشيما بلالار گلدي. بير گون گلديم گؤردوم کي، بير ايلان گيرميش يوواما و بوتون بالالاريمي يئميش.

قيزبوغان بو سؤزلري دئيه رکن گؤزلري ياشاريب بوغازي توتولدو.

قيرميزي باليق: چوخ اوزگونم قيزبوغان افندي، بوتون بو تجاووزلرين قارشيسيني آلماق لازيمدير.

قيزبوغان: بو اوزدن من ده باشلاديم هم اؤز ساواش بيلگيلريمي يئنيله مه يه، هم ده يئني بيلگيلر و ساواش تئکنیکلری اؤيرنمه يه. بوتون ساواش تئکنيکلريني منيمسه ديکدن سونرا گئتديم قارا ايلانلا ساواشماغا. ساريلديم قارا ايلانين بوغازينا و قيلينج ضربه لريمله بوغازيني کسديم. دوغرودور، اينتيقاميمي آلديم، آنجاق بو اينتيقام بئله، منيم آجيلاريمي اونوتدورمادي. آجيلاريمي اونوتمانين بير تک يولو وار. آزادليق آرايانلارا يارديم ائتمک.

قيرميزي باليق: چوخ مرحمتلي ياراديليشسينيز دگرلي قيزبوغان. آنجاق بير سواليم وار. ندن سيزه قيزبوغان دئييرلر؟ قيزلارلا بير دوشمنليگينيزمي وار؟

قيزبوغان: بو آدي بيزه اينسانلار وئرميشدير. من ده بو آدين اوزَرينه بعضي آراشديرمالار آپارديم. اصلینده بيز کرتنکله تورلرينده نيک. بعضن بيزه کرتنکله ده دئييرلر. آنجاق طبيعت بيزي بير آز داها گؤزل ياراتميش. ظاهيري گؤزلليگيميزين يانيندا، حتّی گؤزل قيزلارين دا گؤزلليکلري سؤنوک گؤرونموش. بيزيم گؤزلليگيميزله قيياسدا قيزلارين گؤزلليگي سانکي بوغولموشدور. بو اوزدن ده بيزه قيزبوغان دئميشلر. آنجاق بيزيم قيزلارلا دوشمنليگيميز يوخدور. اونلاري سئوريک. منيم قيزلارلا اويناماقدان خوشوم گلير. آنجاق ندنسه قيزلار بيزلردن هورکرلر. سانکي اونلارا ضرر وئره جکميشيک کيمي داورانارلار. بلکه ده بو اوزدن بيزه قيزبوغان آديني تاخميشلار. تک طرفلي سايقي نين، سئوگي نين درينليگي اولمور. قيزلارين دا بيزي سئومه لري لازيمدير. اونلار ايسه بيزدن قاچيرلار. نه بيليم، بلکه ده قيزلاري ديکسينديرديگيميز اوچون بيزه قيزبوغان دئميشلر. يولچولوغوندا چايدا چيمن قيزلارا راست گلسن اونلارلا اونسييت قورماغي اونوتما. قيزلار چوخ سئويملي ياراديليشدیرلار.

قيرميزي باليق: سيز گئرچکدن ده گؤزل ياراديليشسينيز. طبيعت هم ظاهيري گؤزلليگي سيزه باغيشلاميش، هم ده آزاد دوشونجه ني.

قيزبوغان «ايندي بوردا بکله من سنه ايکي قيلينج گتيرجم»— دئييب داشين آرخاسيندا يوخ اولدو. بير آز زامان کئچديکدن سونرا الينده دؤرد قيلينج گئري دؤندو. قيلينجلاردان ايکيسيني قيرميزي باليغا وئريب «قاراجا باليغا بير تک قيلينجلا ساواشماغي اؤيرتميشديم. سنه ايکي قيلينجلا ساواشماغي اؤيره ده جم.» — دئدي.

ساعاتلارجا قيرميزي باليغا قيلينج چالماغي اؤيرَتدي. قيرميزي باليغين قوللاري يورولوردو. آنجاق ايچينده کي بيتمه ين آزادليق ديلکلري اونو هيجانلانديريردي. قيرميزي باليق بير نئچه آي قيزبوغانين يانيندا قالدي. بعضن سويون کنارينا دا چيخيب ساواشي مشق ائديرديلر. بو مودت ايچينده قيرميزي باليق قيزبوغانين دونياگؤروشو و حيات فلسفه سي ايله ده تانيش اولوردو. قيرميزي باليق قيزبوغاندان اؤيرنميشدي کي، غلبه ني اؤنجه دوشونجه ده و اينانجدا قازانماق لازيمدير. غلبه يه اينانيش چوخ اؤنمليدير. اينانج، غلبه نين ياريسي دئمکدير. قالانيني دا حرکتده و داورانيشدا الده ائتمک لازيمدير. بو دوشونجه و اينانجداکي غلبه سي اوزوندن قيزبوغان قارا ايلاني مغلوب ائتميشدي. قيرميزي باليق تام بير ساواشچي اولما سورجينده ايدي. قيزبوغان اونا بير ده گؤزو باغلي ساواشماغي اؤيرتمک ايسته دي. اوزوم يارپاقلاري ايله قيرميزي باليغين گؤزلريني ساريييب سونرا اونا سالديردي.* قيرميزي باليغين گؤزلري هئچ بير يئري گؤرموردو. قيزبوغان اونا «گؤزلرين گؤرمه ديگينده گؤزلري نين گؤرَويني قولاقلارينا يوکله مه ليسن. قولاقلارين هم ائشيتمه لي، هم ده گؤرمه ليدير. ان ضعيف سسي دويماغي باشارماليسان.» — دئدي. قيرميزي باليق قيلينجلاري ايله ساواشا حاضير دورومدا قيزبوغانين حرکتلريني قولاقلاري ايله ايزله ييردي. بوتون ايچ ائنئرژيسيني قولاقلاريندا مرکزلشديرميشدي. قيزبوغانين ان سس سيز حرکتيني ده سئزه بيليردي. قيزبوغانين بوتون هوجوملاريني گؤزلري باغلي شکيلده اؤنله يه بيلدي. گوندن گونه تام بير ساواشچي اولماق يولوندا ايره لیله ییردی. ان سون گون بير مشق سيراسيندا قيرميزي باليق ساوونمادا دوران قيزبوغانين قيلينجينا ائله بير ضربه ووردو کي، قيلينج ايکييه بؤلوندو. قيزبوغان شاشيرميشدي و «آرتيق سن تام بير ساواشچيسان»— دئميشدي. قيرميزي باليق قانادجيقلاري نين آلتينا ايکي قيلينج تاخدی. قيزبوغاندان آيريلماق ايسترکن «سيز مني روحن و حيسسن يئنيدن ياراتدينيز. سانکي طبيعت سيزي ياخشيليق ائتمک اوچون ياراتميشدير. امين اولا بيلرسينيز کي، اؤيرَتديگينيز بو بيلگيلري و ساواش تئکنيکلريني ياخشيليق و گؤزلليک يولوندا ايستيفاده ائده جه یم. قاراجا باليغي تاپسام اونونلا بير يئرده گئري دؤندويوموزده سيزه اوغراياجاغيق.» — دئدي.

قيزبوغان: گئريمي دؤنمک ايسته ييرسن؟

قيرميزي باليق: بلي، گئري دؤنه جه یم. اؤز منسوب اولدوغوم توپلومو اونوتماق ايستميرم. دنيزه وارديقدان سونرا، اونون آزادليق آنلاييشيني اؤز توپلوموما داشيياجاغام. بيزيم ياشاديغيميز موحيط چوخ کيچيکدير. کيچيک موحيطلرين آزادليق آنلاييشي دا قورتاريجي اولمور. من امينم کي، قاراجا باليغين دا بئله بير نيتي اولموش. اولمايا بيلمزدي. چونکو آزادليق بير فردله سينيرلي* اولا بيلمز. منسوب اولدوغوموز توپلومون دوشونجه سينده دارليق وارسا، او دارليق بيزيم ده آزادليغيميزي انگللر. بو اوزدن ده اؤنجه دنيز دوشونجه سي نين نه اولدوغونو بيلمه لي يم. سونرا دا بو بيلگيلريمه گؤره منسوب اولدوغوم توپلومو دگيشديره بيلرم. قاراجا باليغين بو يولدا بيريکديرديگي بؤيوک تجروبه لري نين اولاجاغينا اينانيرام. اونو تاپسام، بعضی چتينليکلري بير يئرده چؤزه بيله جه یيک.

قيزبوغان: چوخ حاقليسان عاغيللي دوستوم. بو يولدا سنه باشاريلار ديله ييرم. بوتون بيلديکلريمي سنه اؤيرتديم. منيم سالاملاريمي قاراجا باليغا و دنيزده کي بوتون باليقلارا چاتديرارسان.

قيرميزي باليق: چوخ ساغ اولاسينيز قيزبوغان افندي. قازاناجاغيميز اوغورلار سيزين امگينيزين سايه سينده اولاجاقدير. اسن قال چوخ سايقيلي قيزبوغان دوستوموز.

قيرميزي باليق قيزبوغانلا ويداعلاشيب يولا دوشدو. خياليندا قيزبوغانين گؤزل صورتيني، گؤزل سسيني داشييير و سؤيله ديکلريني خاطيرلاييردي. بير داشين يانيندان سوزه رک کئچرکن، بيردن سويون ايچيندن بير شئي سيچيراييب اؤنونده دوردو. قيرخاياق ايدي. ياشلي بير قيرخاياق. آياقلاريني آچيب قيرميزي باليغين اؤنونو کسميشدي. قيرميزي باليق قيرخاياغين قاراجا باليقلا نئجه داورانديغيني بيليردي. اؤزونو توپارلايان قيرميزي باليق «سالام قيرخاياق، لوطفا يولومو کسمه یين. چکيلن کنارا يولوما داوام ائديم.» — دئدي.

قيرخاياق: هارا گئديرسن ياراشيقلي؟

قيرميزي باليق: دنيزه گئده جه یم.

قيرخاياق يوکسک سسله گوله رک دئدي: دنيزده نه ايشين وار؟ بلکه سن ده او فيلوسوف قاراجا باليق کيمي دونياني گزمه يه چيخميسان؟ بوراخ دنيزي. گل بير يئرده دوست اولوب ياشاياق. او آخماق قاراجا باليغين دا دورومو چوخ پيسميش دئييرلر.

قيرميزي باليق: لوطفا قاراجا باليق حاققيندا سايقيسيز دانيشمايين، او منيم فيکير رهبريمدير.

قيرخاياق: دئمه لي قاراجا باليق سنين فيکير رهبرينميش! سنين رهبرين ايندي منم. چونکو من گوجلويم. رهبر گوجلو اولاندير. گل کئچ گؤروم نئجه کئچه جکسن. سن منيم دادليجا يئمه یيم اولاجاقسان و کيمين رهبر اولدوغونو سنه آنلاداجاغام.

قيرخاياق بو سؤزلري دئييب ياواش- ياواش قيرميزي باليغا طرف حرکت ائتدي.

قيرميزي باليق: قيرخاياق، سيزه خبردارليق ائديرم کي، منه ياخينلاشمايين يوخسا چوخ ضرر گؤررسينيز.

قيرخاياق قيرميزي بالغين خبردارليقلارينا ديقت ائتمه دن اونا طرف يئريیيردي. تام ياخينلاشميشدي. بو زامان قيرميزي باليق قيلينجلاريني چيخاراراق يوخارييا طرف توللاندي. حتّی سويون بير مئتر اوستونده بير آن هاوادا گؤروندو. قيرخاياق قيرميزي باليغين هارايا گئتديگيني گؤرمه دي. اطرافينا باخيب اونو آختاريردي. بيردن ايکي قيلينج ايکي چيينينه ساپلاندي. قيرخاياق يوکسک سسله يالنيز بير دفعه باغيرا بيلدي. قيرميزي باليق قيلينجلاريني قيرخاياغين چيگينلريندن چيخارارکن قان فيشقيرماغا باشلادي. قيرميزي باليق يولونا داوام ائدرکن، آرخاسيندا قانا بولاشميش سو گؤرونوردو.

قيرميزي باليق سورعتله دنيزه طرف حرکت ائديردي. يورولمادان گئجه- گوندوز سوزوب گئديردي. بيردن قارشيدان گلن قيزلارين گولوشلري قيرميزي باليغي ديکسينديردي. ياواش-ياواش سس گلن طرفه سوزمه يه باشلادي. قيرميزي باليق سويون اوزرينده دؤنوب ساغ طرفه باخدي. چوخ اوزاقدا بير کند گؤرونوردو. باجالارين اوستونده اوجاقلارين توستوسو دومانلانيردي. قيزمار گونشين آلتيندا قيزلار چايدا چيميرديلر. قيرميزي باليق قيزبوغاني خاطيرلادي کي، قيزلار سئويملي وارليقدیرلار. چايين ديبينه داليب بير قيزين چيلپاق بالديرينا ياواشچا توخوندو. سويون خفيف دالغالاري باليغين توخونوشونو حيسس ائتديرميردي. قيرميزي باليق ديلي ايله قيزين بياض بالديرينا توخوندو. قيز گوله رک يولداشلارينا «آي قيزلار بالديريما خوش بير شئي توخونور. چوخ خوشوم گلدي.» — دئدي. بير باشقا قيز سويون ديبينه داليب آرخاداشي نين بالديرينا توخونان قيرميزي باليغي گؤردو. قيرميزي باليغي اووجونون ايچينه آليب قيزلارا گؤستردي و «آي قيزلار گؤرون بو قيزين بالديرينا توخونان نه ايميش؟» — دئدي. بوتون قيزلار ييغيشيب باخديلار. هاميسي ايچلريني چکه رک «آه ه ه، نه گؤزل باليقدير!»— دئديلر. باليغي ياخالايان قيز اونو دوداغينا ياخينلاشديريب اؤپدو و سونرا دا ديلي ايله قيرميزي باليغين دوداقلارينا توخوندو. قيرميزي باليق قيزين بو توخونوشوندان چوخ خوشلانميشدي. سانکي حياتيندا هئچ بير زامان بئله سئويملي توخونوشا راست گلمه ميشدي. اؤز- ؤزونه «قيزبوغان دوستوم حاقلي ايميش، قيزلارلا اونسييتده اولماق چوخ گؤزل ايميش.» — دئدي. قيزلاردان بيري «آي قيز يازيقدير چوخ اووجوندا ساخلاما بو گؤزل باليغي، اؤلر. بوراخ گئتسين.» — دئدي. قيز قيرميزي باليغي سويا بوراخدي و هاميسي بير يئرده اونون نئجه سرخوشجا سوزولوب گئتديگيني ايزله ديلر. قيرميزي باليق قيزلارين بئله اينجه داورانيشلاريندان چوخ سئوينميشدي. بير آز داها يولونا داوام ائتديکدن سونرا اؤز-اؤزونه «اؤزگورلوک وورغونلاري دا حياتين لذتيندن محروم اولماماليدیرلار. بعضن ائله دوشونورلر کي، بؤيوک هدفلرين يولچولاري بير چوخ ذؤوقلردن اؤزلريني محروم ائتمه ليدیرلر. بو دوغرو باخيش دئييلدير. بوتون جانليلار بو دونيايا خوشبخت اولماق، ذؤوق آلماق اوچون گلميشلر. اؤزگورلوک اولمايان يئرده حياتدان ذؤوق آلماق دا مومکون اولمور. ياشاماق هر بير جانلييا ذؤوق گتيرمه ليدير.» — دئیه دوشونوردو.

سانکي قيزلارين اونونلا بو قدر اينجه جيک داورانيشلاري روحوندا دونيايا يئني بير باخيش پنجره سي آچميشدي. قيرميزي باليق چوخ موتلو و قيزلاردان ميننتدار ايدي.

آرخ سونا چاتميش، چايا قوووشموشدو. قيرميزي باليق بو خياللارلا ايره ليلرکن، بيردن اؤنوندن اونلارجا باليغين آغلاياراق قاچديغيني گؤردو. بيري نين اؤنونو کسيب « نه اولموش، هارا قاچيرسينيز؟» دئيه سوردو. باليقلاردان بيري نفسي توتولا- توتولا «سن ده قاچ، دورما، قاچ! باليق اوتان قيزميش، اؤنونه گلن بوتون باليقلاري اودور.» — دئدي.

قيرميزي باليق اولايين نه اولدوغونو آنلاميشدي. ان بؤيوک ساواشي نين باشلاديغي آن گلميشدي. باليقلارا «قاچمايين، من اونونلا ساواشاجاغام. قاچمانيزا گرک يوخ. هارا قاچسانيز او سيزي تاپيب يئيه جک. دورون! دورون اونونلا بير يئرده ساواشاليم.» — دئدي. هئچ بير باليق دورمادي. قيرميزي باليغين سؤزونو جيدييه آلان يوخ ايدي. هر باليق اؤز جانینین هاييندا ايدي. باليقلار قاچيب قايالارين آرخاسيندا گيزله نيب باليق اودانين قيرميزي باليغي نئجه يئيه جگينه باخماق ايسته ديلر. باليق اودان قورخونج گؤرونومو ايله اورتايا چيخدي. قيرميزي باليغين قاچماماسيني گؤرن باليق اودان اؤنجه بير آز شاشيردي. سونرا «يا قاچا بيلمه ميش، يا دا جانيندان بئزميشدير. آنجاق چوخ دادلي باليغا بنزه يير.»— دئيه اؤز-اؤزونه دوشوندو.

قيرميزي باليق: باليق اودان، لوطفا ايره لي گلمه يین!

باليق اودان: ايره لي گلسم نه ائده جکسن دادليجا؟

قيرميزي باليق: ايره لي گلمنيزي ايستميرم. سيزينله صؤحبتلشمک ايسته ييرم.

باليق اودان: نه صؤحبتي ائده جکسن منيمله دادليجا؟

قيرميزي باليق: بو باليقلار سوروسونون حياتيني نييه پریشان ائديرسينيز؟ نه ايسته ييرسينيز بو زاواللي باليقلاردان؟

باليق اودان اؤز-اؤزونه دوشوندو کي، بو سؤزلر اونا تانيش گلير. باجيسي اونا دئميشدي کي، اوزاقلاردان بير قاراجا باليق گلميش، بعضي صؤحبتلردن سونرا اونلارين آناسي نين قارنيني سؤکوب اؤلدورموشدو. بو اوزدن ده باليق اودان قيرميزي باليغين دا او سويدان اولدوغونو دوشوندو و سئويندي. سئويندي کي، آناسي نين اينتيقاميني آلمانين زاماني تام اولاراق گلميشدير.

باليق اودان: سن قاراجا باليغي تانيييرسانمي دادليجا؟

قيرميزي باليق: بلي، تانيييرام. يعني ائشيتميشم. آزادليق و برابرليک حاققيندا اونونلا عئيني گؤروشلري پايلاشيرام. او منيم دوشونجه اؤندريمدير.

باليق اودان: بيليرسنمي کي، او منيم آنامين قارنيني سؤکوب اؤلدوروبدور؟

قيرميزي باليق: سيز بير قان داواسيندان صؤحبت آچماق ايسته ييرسينيز. من ايسه باليقلارين حياتي حاققيندا دانيشيرام. آنجاق بيليرم کي، او ساواشدا سيزين آنانيز حاقسيز اولموشدور.

قيرميزي باليغين سون سؤزو باليق اوداني قيزديردي و «ايندي من سنه کيمين حاقلي اولدوغونو گؤستره جه یم. حاق گوجلونون طرفينده دير. اوردا دور، قوي سنه حاققین نه اولدوغونو گؤستريم.» — دئدي.

باليق اودان قيرميزي باليغي ياخالاماق اوچون هوجوما کئچدي. قيرميزي باليق بير آتيليشلا باليق اودانين بورنونون اوستونده اوتوروب ايکي قيلينجيني اونون گؤزلرينه سوخدو. باليق اودانين گؤزلري هئچ يئري گؤرموردو. گؤزلريندن قان فيشقيرير، يوکسک سسله باغيريب «ائي وااي، گؤزوم چيخدي!»— دئيه باغيريردي. قايالارين آرخاسيندا گيزلنن باليقلار حئيرتدن شاشيرميشديلار. قيرميزي باليق بير سيچراييشلا باليق اودانين بورونون اوستونده اوتوروب اونون گؤزلريني سورعتلي بير حرکتله سؤکموشدو. باليق اودانين باغيرتيلاري داوام ائديردي. باليقلار قيرميزي باليغين اطرافينا توپلاشيب اونا «آفرين!» دئييرديلر. قيرميزي باليق اوزونو باليقلارا توتوب دئدي: باليقلار، من بو باليق اودان دئييلن وحشيني اؤلدوره بيلرم، آنجاق اؤلدورمورم. قويون کور گؤزلري ايله ياشاسين بوردا و باشقا باليق اودانلارا عيبرت اولسون.

باليقلار بو قهرمانليق قارشيسيندا ائله شاشيرميشديلار کی، نه دئيه جکلريني بيلميرديلر. اونلاردان بيري اوتانا- اوتانا ايره لي گليب «حؤرمتلي قيرميزي باليق، بلکه سيز بيزيم اؤندريميز اولاسينيز.»— دئدي.

قيرميزي باليق: يوخ، منيم گؤرَويم باشقادير. سيزلر اؤز ايچينيزدن اؤزونوزه بير اؤندر سئچين. من داها اوزاقلارا گئتمه لي يم. اوزاقلارا، سونسوزلوغون اؤزونه وارمالي يام. دنيزه قوووشمالييام. دنيزده کي حياتي تجروبه ائديب آزادليغين سونسوزلوق آنلاييشيني آنلامالييام. بو يولدا منيمله همسفر اولماغي سيزلردن ايستمه يه جم. چونکو هر کسين بير حيات شکلي وار. سيز بو موحيطده موتلو اولا بيليرسينيزسه، ياشايين بوردا. آنجاق من يولچولوغوما داوام ائتمه لي يم. بير آرخاداشيم وار، اونو آراييب تاپمالييام.

قيرميزي باليغين اؤزونه گوونه رک بو شکيلده نيطق سؤيله مه سي باليقلارين قورخو دويغوسونو اورتادان قالديرميشدي. اونونلا يولا چيخماغا هوسله نيرديلر. آنجاق قيرميزي باليق بونا راضي اولموردو. قيرميزي باليق دوشونوردو کي، بير آندا هيجانا قاپيليب قرار وئرنلر داها سونرا راستلانديقلاري چتينليکلر قارشيسيندا پئشمان اولا بيلرلر. قاراجا باليغا يولداشليق ائدنلرين ده روح حاللاريني ائشيتميشدي. بو اوزدن قيرميزي باليق بئله حساب ائديردي کي، بؤيوک ايشلر اوچون دونيايا گلميش اولانلار وار. بوتون چتينليکلره کؤکس گره رک يولچولوقدان واز کئچمه يَنلر يئني حياتين، يئني تاريخين، يئني دگرلرين ياراديجيلاري اولورلار. يئني دگرلر ايجاد ائده بيلمه ين باليقلاري بو سفرده يانينا آلماغي دوغرو بيلميردي. بو دوشونجه لري عاغليندا گزديرن قيرميزي باليق اونلارين يولداش اولما تکليفلريني ردد ائتدي. چونکو اؤزلليکله قيرميزي باليق آزادليق عشقي نين فردي اولدوغونو دوشونوردو. اؤزگورلوک عشقي فردين ايچيني يانديريب- ياخماسا او، تئز سؤنه بيلر. گرک ايچريدن بير ائنرژي بيزي بؤيوک هدفلر اوغروندا حرکت ائتمک اوچون تحريک ائتسين. ائشيديلن سؤزلرله بئله چتين يوللارا دوشمک اولماز. ايچريده اؤزگورلوک سئوگيسي يوخدورسا، حياتداکي چتينليکلر اؤزگورلوک هوسيني سؤندوره بيلر. قيرميزي باليق اوزونو باليقلارا توتوب «آرخاداشلار، من يولچولوغوما داوام ائديرم. سيزلر اسن قالين*، ساغليقلا قالين. حياتينيزداکي ان اؤنملي انگل اورتادان قالديريلميشدير.» — دئدي.

باليقلار ال ساللاياراق قيرميزي باليغي اوغورلاديلار و «سن بيزيم حياتيميزي قورتاردين قيرميزي باليق، چوخ ساغ اول، هئچ بير زامان سني اونوتماياجاغيق.» — دئديلر.

قيرميزي باليق دنيزه دوغرو يولچولوغونا داوام ائديردي. چايين آغزي گئنيشله ميش، سونسوز سو بيريکيمي** گؤرونوردو. اوجو- بوجاغي گؤرونمه ين سو بيريکيمي. قيرميزي باليق دنيزه قوووشدوغونو بيلدي. «سئوگيلر، سايقيلار دنيز!» — دئييب رقص ائتمه يه باشالدي. «چوخ اوزاقلاردا سنين حصرتينده ياشايان باليقلارين سئوگيلريني گتيرميشم سنه دنيز، قبول ائت!» — دئييب سئوينجيندن بيلميردي نه ائتسين. قيرميزي باليق دنيزده ايره ليله ديکجه روحونون گئنيشله ديگيني حيسس ائديردي. دنيز بوتون وارليغي ايله اونون روحونو ائتکيله ييردي. بؤيوک موحيطده ياشامانين ذؤوقو بير باشقا ايميش. قيرميزي باليق اؤز-اؤزونه دوشونوردو: «دنيز، قوووشولماسي گرکن سون هدف اولاراق واريلماسينا دگرميش. بو يولدا هر نؤوع عذاب چکمه يه، بو هدفه گؤره بدني و روحو حاضيرلاماغا دگرميش. ائي اؤزگورلوک، سنين حاققیندا نه قدر افسانه لر، ناغيللار ائشيتديک. يولوندا نه قدر چاليشانلار اولدو. نه قدر ده حاقلييميشلار. ائي اؤزگورلوگون رمزي اولان دنيز، سن داريسقال موحيطلرين آرزو ائديب وارا بيلمه ديکلري بير ايدئآلميشسان. من ايندي سنين باغريندايام. سن داملالارين آرزولاديقلاري بوتونسن. بوتونه، سونسوز اولانا قوووشماق دويغوسو ياشاييردي ايچيمده. کؤکسوم دولموشدو اؤزگورلوک نفسي ايله. ياشاماق ايسته ييرم. ياشاماق بو شکيلده اولورموش. قازانيلان ظفر. قازانيلان دنيز، قازانيلان دنيز دويغولاري.»

قيرميزي باليق دنيزلشديکجه بو دويغولار اونون ايچينده دالغالانيردي. دنيز دالغالاري کيمي. دنيزين اوزاقلاردا گؤرونن دالغالارينا بنزر دويغولار دالغالانيردي اونون ايچينده. بدنيني و روحونو سارميش اولان داريسقال موحيطدن تامامن قورتولموشدو. کؤکسونده سونسوزلوغون دوغوردوغو سئوگي دالغالانيردي. آچيب کؤکسونو دنيزه بوشالتماق ايسته ييردي اورگيني. قيرميزي باليق دنيزده اولمانين ذؤوقوندن دويدوقدان سونرا قاراجا باليغي دوشوندو. اونو آرامالي ايدي. آنجاق چوخ يورغون ايدي. دنيزين ديبينه واريب بير داشين آلتيندا ياتماق ايسته دي. صاباح گون دوغرا- دوغماز قاراجا باليغي آراماغا باشلاياجاقدي. آنجاق دنيزين گئجه منظره سي چوخ چکيجي ايدي. سانکي گؤيده کي بوتون اولدوزلار دنيزه تؤکولموشدو. اولدوزلار دنيزده پاريلداشيرديلار. گؤيلرين ده گؤزلليکلري دنيزه تؤکولموشدو. گؤيلر تام اولاراق دنيزده يانسيميشدي. خياللا گئرچکليک بيرلشميشدي. بئله بير گؤزلليک ايچينده قيرميزي باليق يوخويا دالدي.

صاباح ائرکندن قيرميزي باليق گومبولتو سسينه اوياندي. بير سورو باليق بير يئره توپلانميش ماهني سؤيله ييب دانس ائديرديلر. دنيزين گئنيشليگي ايچينده ايلک دفعه ايدي قيرميزي باليق بو قدر بير يئرده رقص ائدن باليق گؤروردو. باليقلار چوخ موتلو ايديلر. قيرميزي باليق دا بو توپلولوغا قاتيلدي. اونلارلا بير يئرده رقص ائديردي. توپلو حاليندا رقص ائتمه ني ايلک دفعه ايدي تجروبه ائديردي. تکباشينا نئچه دفعه رقص ائتميشدي. آنجاق دسته لر حاليندا رقص ائتمه نين لذتي باشقا ايميش. چونکو بوتون توپلولوغون سئوينمه سي باشقا گؤزل گؤرونتو اورتايا قويوردو. بعضن ده تانيماديق باليقلار قيرميزي باليقلا ال- اله وئريب رقص ائديردي. قيرميزي باليق حيسس ائديردي کي، دوستلوغون ان اؤنملي يوللاريندان بيري ده توپلو شکيلده رقص ائتمکدير. چونکو رقص ائتديکجه چئوره سينده اصلا تانيماديغي باليقلاري نه قدر سئوديگيني بوتون وارليغي ايله آنلاييردي. سادجه باليقلارلا دئييل، بوتون وارليقلا قوجاقلاشيردي سانکي. بو اوزدن ده سئوينجي نين حددي- حودودو يوخ ايدي. بو زامان بير ديشي ساريجا باليق آغزيندا قيزيلگول يارپاغي قيرميزي باليغا ياناشدي. قيزيلگول يارپاغيني اونا وئريب بيرليکده رقص ائتمه لريني ايسته دي. قيرميزي باليق ساريجانين بئلينه ساريليب رقص ائتمه يه باشلاديلار.

ساريجا باليق قيرميزي باليغين قولاغينا پيچيلدادي: سن دنيزده مي دونيايا گلميسن؟

قيرميزي باليق: يوخ، من چوخ اوزاقلاردا دونيايا گلميشم. دنيزه يئنيجه گلديم. آنجاق دنيز چوخ گؤزلميش. گلديگيمه گؤره چوخ موتلويام.

ساريجا: من دنيزده دوغولدوم. چوخ اوزاقلار دئديگين يئرلرده نلر اولدوغونو بيلمک ايسترديم. دوغروسو، عاغليمدا هر زامان بير خيال دولاشير. بير گون بو دنيزدن چيخيب اوزاقلاردا محرومييت ايچينده ياشايان همجينسلريمه يارديم ائتمک ايسته ييرم. آنجاق دئييرلر کي، يوللار چوخ تهلوکه ليدير. اوزاقلارا سفره چيخماق خيالي مني ترک ائتمير.

قيرميزي: دنيزده دونيايا گلديگين بلليدير. چوخ نزاکتليسن. اوزاقلارا يولا دوشمن، همجينسلرينه يارديم ائتمه دوشونجن ده چوخ گؤزلدير. بلکه بيرليکده يولا دوشوب گئدريک. من ده يوردوما دؤنه جه یم.

ساريجا: سن «قاراجا باليق»ي تانيييرسانمي؟

بو زامان قيرميزي باليغين بئينينده سانکي ايلديريم چاخدي و ساريجاني باغرينا باسيب «البتته، تانيييرام. من اونو آختاريب تاپماق اوچون گلميشم دنيزه. او ايندي هاردادير؟» —دئدی.

ساريجا باليق سسيني قيساراق قيرميزي باليغين قولاغينا «باغيرما! اونون آدي ياساقدير. ائشيتسه لر گليب سني ده ياخالارلار.» — پيچيلدادي و داوام ائتدي: اوزاقلاردا بدبخت باليقلارين اولدوغونو قاراجا باليق بيزه آنلاتميشدي. اونلارا يارديم ائتمه، اونلاردا دنيز دوشونجه سيني اوياتما ذهنييتيني ده قاراجا باليق بيزه اؤيرتدي. آنجاق...

ساريجا باليق سؤزونو بيتيره بيلمه دي. بير نئچه باليق « آرييا بالقيلار گلديلر، قاچين، قاچين!» —دئيه باغيرديلار.

باليقلار قاچماغا باشلادي. ساريجا «قيرميزي بالیق قاچ! سني ياخالاياجاقلار» — دئدي.

قيرميزي: هارا قاچيرسينيز؟ نييه قاچيرسينيز؟

ساريجا: آرييا باليقلار بيزيم موسيقيميزي، رقصيميزي، ديليميزي ياساقلاميشلار. بير يئره توپلاشديغيميزدا بيزه هوجوم ائدیرلر. قاچ اؤزونو قورتار لوطفا!

قيرميزي باليق دهشته گلميشدي. «ندن ياساقلاميشلار؟ بو قدر گؤزل رقص ائديرديک. يازيق دئييلمي بو رقصلر ياساقلانسين؟!» — دئيه اؤز-اؤزونه دوشوندو. آرييا باليقلار اطرافي موحاصيره ائتميشديلر. قيرميزي باليق اونلارا ديقتله باخدي. ياستي بورون باليقلارين صيفتيندن نيفرت ياغيردي. قولاقلاري نين آلتيندا سونگو بارينديران آرييا باليقلارين ايچيندن بيري اورتايا چيخيب دئدي: سيزلره بو رقصلرين ياساقلانديغيني سؤيلمه ميشديکمي؟ ندن ياساقلانميش رقصلري اويناييرسينيز؟

ساريجا باليق: بو گون بيزيم ان عزيز گونلريميزدن بيريدير. يالنيز بو گون اوچون رقص ائتديک. بير داها رقص ائتميه جه یيک.

آرييا باليق: رقص ائتمک اوچون ايذن آلميشدينيزمي؟

ساريجا باليق: خئيير، آلماميشديق. دوشوندوک کي، رقص ائتمک اوچون ايذن آلماغا نه گرک وار.

آرييا باليق يوکسک سسله «ايندي سيزه گؤستره جه یم ايذنسيز رقص ائتمه نين جزاسي ندير.» —دئيه باغيردي و «اؤنجه بو ساريجا باليغي ياخالايين!» — دئدي.

بو زامان اولايلاري سئير ائدن قيرميزي باليق آرييا باليقلارا اوزونو توتوب دئدي: اونا توخونماسانيز خئييرينيزه اولور. او منيم آرخاداشيمدير، دوستومدور. کيمسه اونا توخونا بيلمز.

آرييا باليقلارين باشچيسي دئدي: سن ده کيمسن؟

قيرميزي باليق: من ده بو دسته نين بير عوضوويم. رقص ائديرديم اونلارلا. يانليش بير ايش گؤردويوموزو دوشونمورم. گلدينيز و انگل اولدونوز. ندن بيزيم موتلو اولماغيميز سيزلري راحاتسيز ائدير؟

ساريجا باليق قويروغو ايله قيرميزي باليغا توخونوب خبردارليق ائدرجه سينه قولاغينا پيچيلدادي: بئله دانيشما! اونلار سني اؤلدورر يا دا ياخالاييب آپارارلار قاراجا باليغين يانينا.

آرييا باليقلارين باشچيسي دئدی: بوردا بوتون داورانيشلار بيزيم يازديغيميز قانونلار اساسيندا اولماليدير. بيزيم يازديغيميز قانونلارا گؤره ده بو رقصلر ياساقلانميشدير. يالنيز آرييا باليقلارين رقصي سربستدير.

قيرميزي باليق: ياخشي، سيزدن بير سوال سوروشوم او زامان. ندن بو گؤزلليکده رقصي ياساقلاميشسينيز؟

آرييا باليق: سن چوخ آرتيق دانيشماغا، قانونلارا قارشي گلمه يه باشلادين. ندن ياساق اولدوغونو سنه آنلاداجاغيق.

آرييا باليق بو سؤزلري دئييب و «بو قيرميزي باليق باشدا اولماقلا بورداکي بوتون باليقلاري ياخالايين!» — امرینی وئردی.

آرييا بالیقلار هوجوما کئچدي. بير نئچه باليغي يارالاديلار. بير نئچه باليغين باشلاريني، قويروقلاريني بير- بيرينه باغلاييب اسير آلديلار. قيرميزي باليغي دا ياخالاماق ايسته ديلر. بو زامان قيرميزي باليق قولتوغونون آلتيندا گيزلين ساخلاديغي قيلينجلاريني چيخاردي و اونا هوجوم ائدنلرله ساواشا گيردي. قيرميزي باليق اونلارجا آرييا باليغين باشيني بدنيندن آيیردي. بو زامان گؤردو کي، ساريجاني ياخالاييب اسير آپاريرلار. آرييا باليقلارينا هوجوم ائتمه يه باشلادي. اونلارين صفيني يارا- يارا ايره ليله ييردي. آرييا باليقلار شاشيريب قالميشديلار. بو ساواشچي باليغين قيلينج اويناتماسي اونلاري قورخويا سالميشدي. قيرميزي باليق قارشيسينا چيخان آرييا باليقلاريني قيلينجدان کئچيريردي. قويروقلاريندان، باشلاريندان بير- بيرينه باغلاناراق اسير آلينان بالقيلارين باغلاريني قيريب اونلاري سربست بوراخيردي. سربست بوراخيلان باليقلار دا بو ساواشچي قيرميزي باليغين جسارتينه و ساواشچيليق باشاريسينا حئيران قالميشديلار. قيرميزي باليق آرييا بالقيلارين جبهه سيني ياريب ساريجا باليغا چاتدي. بير آز اؤنجه اؤزونو آرييا بالقيلاري نين باشچيسي کيمي گؤسترن ياستي بورون باليق قولاغينداکي سونگونون* اوجونو ساريجا باليغين قارنينا داياييب نفه سي توتولا- توتولا قيرميزي باليغا «ياخين گلمه! ياخين گلمه! ايره لي گلسن سونگونو سوخاجام ساريجا باليغين قارنينا»— دئدی.

قيرميزي باليق چوخ قيزقين ايدي. ساغ الينده کي قيلينجيني قالديريب آرييا باليغا طرف آتدي. قيلينج آرييا باليغين ساغ گؤزوندن گيريب اوجو سول گؤزوندن چيخدي. آرييا باليق باغيراراق آغزينا پيس سؤزلر آلماغا باشلادي. قيرميزي باليق ساريجاني باغرينا باسيب و «کئچميش اولسون!» — دئدي.

ساريجا باليق قيرميزي باليغين قوجاغيندا راحاتلاميشدي. آنجاق چوخ انديشه لي ايدي. اوزونو قيرميزي باليغا توتوب دئدي: منيم قهرمانيم. آفرين سنه! آنجاق بونلار سني راحات بوراخماياجاقلار. بونلار سني تاپيب ياخالاياجاقلار. چونکو سن ده دنيز باليقلارينا قاراجا باليغي خاطيرلاديرسان.

قيرميزي باليق يئنه ده قاراجا باليغين آديني ائشيتديگينده روحوندا سانکي فيرتينا باش قالديردي. ساريجا باليقدان سوروشدو: قاراجا باليق ايندي هاردادي؟

ساريجا باليق دنيزين آلتيندا چوخ اوزاقلاردا گؤرونن بير داغا ايشاره ائديب دئدي: او داغي گؤرورسنمي؟

قيرميزي: گؤرورم.

ساريجا: او داغين آلتيندا ائروين آديندا قورخولو بير زيندان وار. قاراجا باليق اوردا حبسده دير.

قيرميزي: ندن اونو حبسه آلميشلار؟

ساريجا: چونکو او...

ساريجانين سؤزو يئنه ده ياريمچيق قالدي. چئوره ني يارديما گلن آرييا باليقلارين اوردوسو قوشاتميشدي. قيرميزي باليغين يارالاديغي بير نئچه آرييا باليق فرار ائتميش و قرارگاها مغلوب اولدوقلاريني دويورموشدو. آرییا بالیقلار تعجیلی توپلانتی کئچیریب قيرميزي باليقلا ساواشماق اوچون داها موکممل و تجهيز ائديلميش دوزنلي بير اوردو گؤندرميشدي. آيريجا، بو اوردويا امر وئريلميشدي کي، قيرميزي باليغي ياخالاديقدان سونرا حبس ائتمه سينلر. چونکو بير دفعه قاراجا باليق اؤرنه یينده يانيلديلار. ايکينجي بير قاراجا باليق ايستميرلر. ايندي قالميشلار قاراجا باليغين الينده بيلميرلر اونونلا نه ائتسينلر. اؤلدورسه لر بوتون دنيز باليقلاري اينقيلابا قالخاجاق. سربست بوراخسالار دنيزده کي باليقلاري آرييا باليقلارينا قارشي اؤرگوتلنديره جک. بو سببدن ده آرييا باليقلارينا قيرميزي باليغي ياخالاييب دنيزدن کنارا چيخارمالارينا امر وئريلميشدي. اوردا ديگر باليقلار کيمي اؤلمه سي داها مقصديؤنلو ايدي. آرييا باليقلار خئيلي دوشوندوکدن سونرا بئله قرارا گلميشديلر کي، ياخشي نظارت ائده بیلمک اوچون اعتيراض ائدن باليقلاري دنيزين ديشينا چيخارسینلار. چونکو اوردا نئجه اؤله جکلريني دنيزده کي باليقلار بيلمه يه جکديلر.

قيرميزي باليق دوستو ساريجا باليقلا بير يئرده قوشاتيلميشدي. گئت- گئده موحاصيره دايره سي داراليردي. قيرميزي باليق قيلينجلاري ايله ساواشا حاضير ايدي. آنجاق باشي نين اوستونه باخيب گؤردو کي، بؤيوک بير تورو بير نئچه آرييا باليق آغزي ايله توتوب اونلارين باشي اوزرينه طرف چکيرلر. آرييا باليقلار قيرميزي بالغين تام باشي نين اوستونده تورو بوراخديلار. قيرميزي باليق ساريجا ايله بير يئرده تورا دوشموشدولر. آرتيق ترپنه بيلميرديلر. اسير آلينميشديلار. آرييا باليقلارين باشچیسی «آپارين بو يارامازلاري بوراخين ساحيله، اوردا اؤلسونلر!» — دئدي.

قيرميزي باليق بير آن قورباغانين اونا ائتديگي ياخشيليغي خاطيرلادي. او، ساحيلده اؤلمه يه جکدي. چونکو بوغازي نين آلتيندا قورباغانين سو تولوغو وار ايدي. آنجاق ساريجادان ساري چوخ ناراحات ايدي.

قيرميزي باليق اوزونو ساريجا باليغا توتوب دئدي: قورخورسانمي؟

ساريجا: يوخ، قورخمورام. سنينله بير يئرده اؤله جه یيم اوچون قورخمورام. من ساواشچي دئييلم، آنجاق اؤزگورلوک وورغونويام. کئشکه سنين کيمي بير ساواشچي اولسايديم. ساواشچي اولماسام دا عاغليمدان، دويغولاريمدان اؤزگورلوک هئچ بير زامان عکسيک اولمادي. آرييا باليقلارا يئم اولماقدانسا، بير ساواشچي باليقلا بير يئرده اؤلمک داها شرفليدير.

قيرميزي باليق هئچ بير شئي سؤيله مه دي. سوسوب دوردو. ساريجانين بو سؤزلري اونو دريندن ائتکيله ميشدي. تورون ايچينده ساحيله، اؤلومه دوغرو سوروکله نيرديلر. قيرميزي باليغين ايچيندن بو غريبه دويغولار کئچيردي: «دئمک هر يئرده عدالتسيزليک وار. عدالتسيزليک دوردوقجا ساواشلار دا اولاجاقدير. محکوملارين ساواشي هئچ بير زامان بيتمه يه جک. دونيانين هاراسيندا اولورسا اولسون؛ ايستر دنيزده، ايستر چايدا، ايستر کيچيک بير آرخدا هر زامان عدالت يولوندا ساواش اولاجاقدير. بو ساواش دورماياجاقدير، دورماماليدير. دوردوغوندا بوتون باليقلار ظولمه تسليم اولموشدور آنلامينا گله جکدير. بئله بير موحيطده ياشاماق جهننمدن ده پيسدير. کؤله ليگه، اسارته قارشي دايمي ساواش اولاجاقدير. يازقيم، اينانجيم و دوشونجه لريم منه ده بو ساواشين، بو تاريخين بير پارچاسي اولماغي قيسمت ائتميشدير. بو، منيم همجينسلريم قارشيسيندا تاريخي گؤرَويمدير. بو يولدان سونونا قدر دؤنمه يه جگم.»

قيرميزي باليق بو خياللار ايچينده ساريجا باليقلا بير يئرده ساحيله سوروکله نيرديلر. آرييا باليقلار بو ايکي باليغي ساحيله بوراخيب «دنيزده ياشاماق سيزه ياراشمادي. ايندي قالين قوملارين ايچينده موباريزه آپارين!» — دئييب گوله- گوله گئري دؤندولر. قومسال ساحيله چيخار- چيخماز ساريجا باليق چيرپينماغا باشلادي. قيرميزي باليق دا سانکي اؤلورجه سينه چيرپينماغا باشلادي. آرييا باليقلار گئتديکدن سونرا قيرميزي باليق بوغازي نين آلتينداکي قورباغا تولوغوندا بيريکديرديگي سودان داملا-داملا ايچيب ساريجا باليغي قورتارماغا چاليشدي. بيردن گؤزلري ساحيلده اؤلموش، اؤلدورولموش مينلرجه باليغا ساتاشدي. بوتون بونلارين هاميسيني آرييا باليقلار ساحيله چيخاريب اؤلومه ترک ائتميشديلر. قيرميزي باليق دهشته گلدي. بو قدر باليقلار آرييا باليقلارين عيرقچي فيکيرلري نين قورباني اولموشدو. قيرميزي باليق چوخ گرگين ايدي. آنجاق ايلک اؤنجه ساريجا باليغي قورتارمالي ايدي.

ساريجا باليغين آغزينا داملالار اؤتورور، سونرا دا اونون قویروغونو آغزي ايله توتوب دنيزه طرف سوروکله ييردي. ساريجا باليغين آغزينداکي سويون بيتديگيني حيسس ائتديگينده يئنيدن اونون آغزينا سو داملاديب دنيزه طرف سوروکله مه سينه داوام ائديردي. دوروم چوخ گرگينلشيردي. چونکو قيرميزي باليغين تولوغونداکي سو آزاليردي. قيرميزي باليق قان- تر ايچينده ايدي. هم اؤزونو، هم ده ساريجاني بو تهلوکه دن قورتارمالي ايدي.

بو زامان ساريجا باليق دئدي: قيرميزي، مني بوراخ! من اؤله جه یم بوردا. سن گئت قاراجا باليغي قورتار. واختيني مني قورتارماقلا ايتيرمه! مني قورتارا بيلميه جکسن. لوطفا گئت قاراجاني قورتار! اونون دوشونجه سيني باليقلار منيمسه سه لر آرييا باليقلارين عيرقچيليکلرينه سون وئره بيلرلر. منيم حياتيمين چوخ دا اؤنَمي يوخدور.

قيرميزي: دوستوم، سني قورتاراجاغام. سني اؤلومه تک ائديب گئتسم من گئرچک بير ساواشچي اولا بيلميرم. بو آن منيم حياتيمين معناسي سني قورتارماقدير. آغزيني آچ بير آز داها سنه سو وئريم. آز قالميشيق دنيزه، صبيرلي اول! اوماريم تولوغومداکي سو بيتمز و بيز قورتولموش اولوروق.

قيرميزي باليق تولوغونداکي سويون بيتمک اوزره اولدوغونو حيسس ائتدي. دنيزه قوووشماغا آزجا مسافه قالميشدي. ساريجا باليغين آغزينا بير داها سو داميزديريب چيرپينا- چيرپينا تکباشينا دنيزه طرف حرکت ائتدي. دنيزه گيرديکدن سونرا تولوغو يئنيدن سو ايله دولموشدو. دولو تولوغو ايله تکرار ساريجا باليغين يارديمينا قوشدو. آرتيق بو دفعه ساريجاني قورتارا بيله جگيندن امين ايدي. ساريجا باليغين آغزينا سو داميزديرا- داميزديرا اونو سوروکله ييب سونوندا دنيزه سالا بيلدي. ساريجا باليق دنيزه قوووشمانين موتلولوغونو ياشاييردي. قيرميزي باليغا ساريليب «قهرمانيم، ياشا سني! گوجلو دوستوم منيم. يئنيدن ياشايا بيله جه یم. بو حياتيمي سنه بورجلويام.» — دئدي.

بير يئرده اوزه-اوزه، سوزه- سوزه دنيزين قيراغيندا بير داشين آلتيندا يئرلشديلر. قيرميزي باليق بير آز صبر ائتدي کي، ساريجا باليق دنيزين ديشيندا ياشامانين قورخوسونو جانيندان چيخارسين. داها سونرا «ايندي قاراجا باليقدان دانيشا بيلرسن. آنلات منه قاراجا باليغين باشينا نه لر گلدي؟» — دئدي.

ساريجا باليق: قاراجا باليق دنيزه يئنيجه گلديگينده بير نئچه ناققا و باليق اودان اؤلدورموشدو. باليقلارين باشيندان تهلوکه لري يوخ ائتميشدي. بو اوزدن ده باليقلارين آراسيندا اونا بؤيوک سايقي وار ايدي. بو آرادا دنيزده بعضي کيرلي اللر چيرکين ايشلرله مشغول ايديلر. بيلميرم نئجه اولدوسا آرييا باليقلار دنيزين بؤيوک بير قيسمينده ايقتيداري اله کئچيرديلر. ياخشي اؤرگوتله نيب اؤز ايستيلاريني برقرار ائتديلر. آرييا ديلينه، کيمليگينه منسوب اولمايان نه وارديسا ياساقلاندي. باشقا باليقلارين ديللري، موسيقيلري، رقصلري ياساقلاندي. دوروم چوخ گرگينلشميشدي. هر هانسی باليق آرييا باليقلارين بويوروقلارينا تابع اولماسايدي جزاسي يا اؤلوم يا دا زيندان و ايشکنجه ايدي. هر گون اونلارجا باليق اعدام ائديلير، بير سورولري ده زيندانا آپاريليرديلار. آیری- سئچکیلیک آرتديقجا بوتون باليقلار گؤزلريني قاراجا باليغا تيکمه يه باشلادي. چونکو يالنيز او، هم بير ساواشچي ايدي هم ده درين دوشونجه لري وار ايدي. اؤزگورلوک حاققیندا گؤزل نيطقلر سؤيله ييردي. قاراجا باليغين حيات تاريخچه سيني باليقلار بيلديکچه اونون آرييا باليقلارا قارشي ساواشدا اؤندر اولماسيني ايسته ييرديلر. قونوشماسي ايله باليقلاردا روح يوکسکليگي يارادا بيليردي. آنجاق او، بونو قبول ائتميردي. «اؤندرليک مني سيزدن اوستون اولاراق گؤستره جک، منيم اؤنومده سيزلري ايطاعته زورلاياجاقسا، بونو کسينليکله قبول ائتمرم. آنجاق آرييا باليقلارين ظولمونه قارشي موجاديله يه ده قاتيلاجاغام.» — دئييردي. دنيزده کي بوتون باليقلاري بو دوروما قارشي اؤرگوتلنديرمک ايسته ييردي. بير قونوشماسيندا «هر شئيدن اؤنجه ذهني باخيمدان سيلاحلانماليييق. اؤزگورلوک فلسفه سيني آنلامالي، اؤزگور بير حياتين نئجه بير نعمت اولدوغونو بيلمه لي یيک. بو اوزدن ده اسارت دوغوران گؤروشلري بوتونويله ذهنيميزدن سؤکوب آتماليييق. بونون تملينده ايسه، سئوگي و سايقي دورماقدادير. بوتون باليقلار بير- بيريني سئومه لي، برابر حاقلارا صاحيب اولماليدیرلار.»— سؤيله دي. بو شکيلده نيطقلر سؤيله ييردي باليقلارا. بير گون تام بو سيرادا آرييا باليقلار هوجوما کئچديلر. بير چوخ باليقلاري اؤلدوروب بير چوخونو دا اسير ياخالاديلار. قاراجا باليق اوچ گون اوچ گئجه تکباشينا آرييا باليقلارلا ساواشدي. آرييا باليقلار قاراجا باليغين ديره نيشيني گؤردوکلرينده تقوييه قوووه گتيرديلر. قاراجا باليق يورولموشدو. سونوندا اونو يارالاديلار. قاراجا باليغين قيلينجي دوشموشدو. يارالي قاراجا باليغي ياخالاييب آپارديلار. اونون ياخالانماسي دنيزده کي بوتون باليقلاردا روح دوشگونلوگو اولوشدوردو. باليقلارين ديره نيش و ساواش ايراده سي قيريلميشدي. قاراجا باليغي دنيزين آلتيندا يئرله شن «ائروين» آدلي قورخونج بير زيندانا آپارديلار. اورادا اونا چوخ ايشکنجه وئرميشلر. «سن آرييا عيرقي نين اوستونلوگونو بوتون باليقلارين اؤنونده اعتيراف ائتسن اؤزگور بوراخيلاجاقسان.» — دئميشلر. آنجاق قاراجا باليق بونو قبول ائتمه ميش. بوگونه قدر قاراجا باليقدان بو اعتيرافي آلماق اوچون اونو ايشکنجه ائدیرلر. بوتون باليقلار بيلير کي، قاراجا باليق اونلارين اؤزگورلوکلري يولوندا ايشکنجه ائديلير.

قيرميزي باليق ساريجانين سؤيله ديکلريني ديققتله دينله ييردي. اؤنجه بير آز سوسوب دوشونمه يه باشلادي. سونرا اوزونو ساريجايا توتوب «قاراجا باليقدان داها نه لر خاطيرلاييرسان؟» — سوردو.

ساريجا: قاراجا باليق چوخ اوزاقلاردا محرومييت ايچينده ياشايان باليقلارين اولدوغو حاقدا دا دانيشيردي. ياديمدا قالان باشقا اؤنملي بير شئي ده وار. قاراجا باليق «منيم حياتيم اؤزگولوک يولوندا فدا اولا بيلر. آنجاق اؤزگورلوک يولونون يولچولاري هر زامان اولاجاقدير. اونوتمايين، بير زامان من اولماسام دا آرييا باليقلارين اسارتيندن قورتولماق اوچون يئني ساواشچي باليقلار اورتايا چيخاجاقدير. بو بير ضرورتدير. اؤزگورلوک بايراغي دنيزين ديبلرينده آرييا باليقلارين آياقلاري نين آلتيندا تحقير ائديله بيلمز. بو بايراغي يوکسلده جک يئني ساواشچيلار اولاجاقدير. بير زامان آرانيزدان بئله بير ساواشچي چيخارسا، اونا سؤيلرسينيز قاراجا باليق دئدي کي، آرييا باليقلارين اسارتيندن قورتولماق اوچون «فئرديس»ي اؤلدورمک لازيمدير.» — دئدي.

قيرميزي: فئرديس؟ فئرديس هانسي باليقدير؟

ساريجا: من فئرديسي گؤرمه ميشم. آنجاق آرييا باليقلارين عيرقچيليک نظرييه سيني او حاضيرلاميش دئييرلر.

قيرميزي باليق اؤز-اؤزونه بير نئچه دفعه « فئرديس- فئرديس» - دئيه پيچيلدادي و سونرا دا ساريجا باليقدان سوردو: فئرديس هاردا اولا بيلر سنجه؟

ساريجا: من دقيق بيلميرم. آرييا باليقلار اونون يئريني گيزلين ساخلاييرلار. بؤيوک احتيمالا گؤره قاراجا باليق فئرديسين هاردا اولدوغونو بيلير. بو اوزدن ده اؤنجه قاراجا باليغي قورتارماق لازيمدير. قاراجا باليغي «ائروين» زيندانيندان قاچيرا بيلسک، او، بوتون باليقلاري اؤرگوتلنديره بيلر. اونون باليقلار اوزرينده و دنيزده بؤيوک معنوي تاثيري وار.

قيرميزي: او زامان فئرديسي اؤلدورمک اوچون اؤنجه قاراجا باليغي قورتارماليييق، دئييلمي؟

ساريجا: منيم بير پلانيم وار. چوخ ريسکلي پلاندير.

قيرميزي: هر حالدا بو ايش ريسکسيز اولماياجاق.

ساريجا: او زامان منيم پلانيمي اويقولاياليم.*

قيرميزي: ندير سنين پلانين؟

ساريجا: گل، يولدا آنلاداجاغام.

قيرميزي و ساريجا باليقلار اينجه ياشيل اوتلارا ائله بورونموشدولر کي، سانکي دوغوشدان اونلار ياشيل باليقلار سويوندانميشلار کيمي گؤرونوردولر. «ائروين» زينداني نين يئرلشديگي دنيزين آلتينداکي داغا طرف سوزولوب گئديرديلر. يولدا بعضي تانيديقلاري باليقلارا راست گليرديلر. آنجاق باليقلار بونلاري تانييا بيلميرديلر. گئرچکدن ياشيل باليق اولدوقلاريني سانيرديلار. آرييا باليقلارين گوج مرکزي «ائروين» زينداني نين يئرلشديگي مکاندا ايدي. قيرميزي و ساريجا باليقلار داغا طرف يؤنه ليشلري سيراسيندا آرييا باليقلارين يوکسک سسله چاغريلاريني دويدولار. بير نئچه آرييا باليق دنيزده دولاشيب و «دويدوق- دويماديق دئمه یين. بو گون فئرديس باليغين قونوشماسي اولاجاق. بوتون باليقلارا شعر سؤيله يه جک. بوتون باليقلارين گلمه سي ايسته نيلير... دويدوق- دويماديق دئمه یين.» — دئييرديلر. بير چوخ باليق قورخوسوندان، بير چوخلاري دا فئرديس باليغين نه لر سؤيله يه جگيني دويماق اوچون «ائروين» زينداني نين يئرلشديگي داغا طرف آخين ائديرديلر. قيرميزي باليق بو قدر باليق سورولرينه هئچ بير زامان راست گلمه ميشدي. باليقلار دنيزين موختليف يئرلريندن داغا طرف آخين ائديرديلر. آرتيق داغا چاتميشديلار. او قدر باليق وار ايدي کي، فئرديس باليغين يئرلشديگي تپه گؤرونموردو. قيرميزي باليق فئرديس باليغي ياخيندان گؤرمک ايسته ييردي. ندن قاراجا باليغين اونون اؤلدورولمه سيني ايسته ديگيني آنلاماق ايسته ييردي. بو اوزدن ده ايکي ياشيل باليق باليقلارين ايزديحاميني يارا- يارا فئرديس باليغين قونوشاجاغي يئره ياخينلاشيرديلار. فئرديس باليغين قونوشاجاغي تپه نين اؤنونده سيلاحلي آرييا باليقلاري دورموشدولار. اؤلو باليقلارين سومويوندن دوزلديلميش سونگولري قولاقلاري نين اوستونه تاخيب حاضير دايانميشديلار. بونلار فئرديس باليغين قورويوجولاري ايديلر. ايکي ياشيل باليق تام اؤن سيرايا کئچميشديلر. فئرديس باليغي ياخيندان گؤرمک مومکون اولاجاقدي. تپه نين باشينا ياستي بورون بير باليق چيخدي. اوزونو اوجو- بوجاغي گؤرونمه ين باليقلارا توتوب «آرييا باليقلارين فيکير دده سي فئرديس باليق سيزلره سون شعرلريني اوخوماق اوچون قارشينيزدا حاضير اولماقدادير.» — دئدي. تاماشاچي آرييا باليقلار «هورا!» چکديلر. بير چوخ باليقلار سوروسو ده اونلارا قاتيليب «هورا!» دئديلر. صيفتي قيريشميش، چيرکين گؤرونوملو ياشلي بير باليق تپه نين باشينا ديرمانيردي. يئريمکده چتينليک چکديگي اوچون ايکي آرييا باليق قولتوغونون آلتينا گيريب اونون تپه يه ديرمانماسينا يارديمچي اولوردولار. تپه نين باشيندا اونون اوچون اؤزل اولاراق حاضيرلانميش مرمر بير داشين اوستونده اوتوروب اؤنجه اوجو- بوجاغي گؤرونمه ين باليقلار سوروسونه باخدي. داها سونرا قويروغونون اوستونده دايانيب قابا سسي ايله باغيراراق يئنيجه يازديغي شعرلريني اوخوماغا باشلادي:

بيز، اوستون باليقلار سويوندانيق بيز

ان تميز عيرقدير بيزيم عيرقيميز.

آرييا عيرقيندن اولان باليقلار

يالنيزجا اونلارين ياشام حاققی وار.

چونکو ان موقدس، ان اوجا عيرقيز.

بو عيرقين امرينده اولمالي دنيز.

اوزاقدان، ياخيندان بوتون گلمه لر

اونلارين بيلمه سي نه لردير، نه لر؟

آرييا عيرقينه کؤله اولمالي

يا دا کي، دنيزدن هپ قووولمالي.

بيزه اوستونلوگو وئرميش يارادان

پارلاديقجا گونش، دوردوقجا جاهان.

داوام ائدر بيزيم اوستونلوگوموز

بؤيله جه چوخ موتلو اولور کؤنلوموز.

بودور بيرليکده ليک، بودور عدالت

بودور تام حققیقت، بودور سعادت.

کيمسه بونو قبول ائتميرسه، دئمک

تانرييا قارشيدير، محو اولسون گرک.

اوتوز ايل زحمته قاتلاشيب همن

آرييا ديليني ديريلتميشم من.

دنيزده بير تک ديل قونوشولمالی

آرييا ديلينه آليشيلمالي.

فئرديس قونوشماسيني بيتيرر- بيتيرمز آرييا باليقلارين يوکسک آلقيشلاري دنيزی بورودو. «ياشاسين فئرديس، ياشاسين فئرديس!»- دئيه باغيريرديلار. آرييا باليقلارين ديشيندا بوتون باليقلار پريشان گؤرونوردولر. چونکو فئرديس باليغين اوخودوغو شعرلر آرييا باليقلارين بوندان سونراکي سيياستلريني بللي ائديردي. فئرديس باليغين آنلاتديغينا گؤره باليقلارا چوخ باسقي اويقولاناجاقدي. باليقلارين چوخو کور- پئشمان گئري دؤنوردولر. قوروماجيلارين اؤنونده دوران ايکي ياشيل باليق فئرديس باليغي ياخيندان گؤره بيلميشديلر. قيرميزي باليق، حتّی اونون اوزونده کي نيفرتي ده شعر اوخويارکن سئزه بيلميشدي. قيرميزي باليق اؤز-اؤزونه «گئرچکدن ده قاراجا باليق حاقلي ايميش. دنيزده باريش ساغلانماسي اوچون فئرديس باليغي اؤلدورمک لازيمدير.» — دئیه دوشوندو. آرييا باليقلار چوخ موتلويدولار. باليقلارين داغيلمالاريني ايسته ديلر. ايکي ياشيل باليق دا گئرييه دؤندولر.

گون باتميشدي آرتيق. آيلي بير گئجه ايدي. اولدوزلار هم گؤيده، هم ده دنيزده پاريلداشيرديلار. قيرميزي باليق چوخ دالقين گؤرونوردو. اوزونو ساريجايا توتوب دئدي: قاراجا باليغي نئجه قورتاراجاغيق؟

ساريجا باليق چوخ اوزاقلاردان سورونوب اونلارا طرف گلن بولودلارا ايشاره ائديب دئدي: قيرميزي، گؤرورسنمي بيزه طرف ياواش- ياواش سورونن بولودلاري؟

قيرميزي: گؤرورم ساريجا، گؤرورم.

ساريجا: او بولودلارين گليب اولدوزلارين، آيين اؤنونو کسديگي زامان قاراجا باليغي قورتارما عمليياتينا باشلاماليييق.

قيرميزي باليق ساريجانين عاغلينا «آفرين!» دئييب گولومسه يه رک سؤيله دي: چوخ حاقليسان ساريجا، قارانليقدا بيزي گؤرمه لري چتين اولاجاق.

ساريجا: آنجاق بيلميرم کي، بيزه يارديمچي گوج لازيمدير يا يوخ. بو قدر بؤيوک بير ايشي تکباشينا باشارا بيله جکسنمي؟

قيرميزي: ساريجا، بؤيوک ايشلر تکباشينا ائديلير. من يولا دوشدويومده نئجه چتينليکلرله راستلاناجاغيمي بيليرديم. آنجاق بونا اؤز شعورومدا، ويجدانيمدا قرار وئرديم و يوللارا دوشدوم. بلکه ده يارديم اولسا داها ياخشي اولور. آنجاق بونون اوچون گئجدير. آيريجا، آرييا باليقلارين جاسوسلاري هر يئرده دولاشير. بو عملييات حاققیندا بيلگيلري اولورسا، «ائروين» زينداني نين موحافيظه سيني داها دا گوجلنديررلر. بو ايشي يا تکباشيميزا ائده جه یيک، يا دا بو يولدا اؤله جه یيک. البتته سن گلمه يه ده بيليرسن. بلکه سنين حياتيندا باشقا هدفلرين ده اولا بيلر. باليقلار بيلينجلي اولاراق بللي ائتديکلري هدفلر يولوندا ساواشمالي، بو يولدا اؤلوب-اؤلدورمه ليدیرلر. بيليرسن کي، بو چوخ چتين يولدور. بو يولدا جان سئوداسي وار. من بو آماج اوچون دوغولدوغومو دوشونورم. دوشونورم کي، منيم دونيايا گلمه گيمين سببي بودور، يعني آزادليق يولوندا سون نفسيمه قدر موباريزه.

ساريجا: بيليرسنمي قيرميزي؟ من قاراجا باليغين دونياگؤروشونون تاثيري آلتيندا قالميشديم. آنجاق بؤيوک بير ساواشا قاتيلماق ايمکانيني، جسارتيني اؤزومده حيسس ائتميرديم. دوشونوردوم کي، بو قدر بؤيوک بير آماج يولوندا منده ساواشاجاق گوج يوخدور. آنجاق ايندي سنينله يم. سنين يانيندا اولماق مني موتلو ائدير. سندن گوج آليرام. سني هئچ بير زامان يالنيز بوراخماياجاغام. اؤلسک ده بير يئرده اؤله جه یيک. هئچ بير زامان سندن آيريلماياجاغام. چونکو آزادليق سئوگيسي منيم روحومو سارميشدير آرتيق. بو سئوگي روحومو سارديغي گوندن بري اؤزومو چوخ گوجلو حيسس ائديرم. من آرتيق اسکيدن اؤزونو ضعيف سانان باليق دئييلم. بلکه من ساواش ائييتيمي آلماميشام. آنجاق آزادليق و قورتولوش عشقي ايچيمي دولدورموشدور. من سني يالنيز بوراخا بيلمرم قيرميزي. بوراخسام، ياخالاديغيم فورصتي قاچيرارام. سنسيز بو حياتين منيم اوچون بير آنلامي يوخدور. سن منيم اوچون سادجه بير باليق دئييلسن. منيم اينانجيمين، آزدليق دونيامين اؤرنه گيسن، ساواشچيسيسان. سندن آيري منيم حياتيمين نه آنلامي اولا بيلر کي؟ سنی بو ساواشدا يالنيز بوراخسام، گله جک و تاريخ هئچ بير زامان مني باغيشلاماز. آرتيق يازقيميز بير- بيرينه دويونلنميشدير. بير يئرده ساواشاجاغيق. بلکه منيم ده اليمدن بير ايش گلر.

قيرميزي باليق ساريجانين بوينونا ساريلدي. ساريجانين سؤزلري قيرميزيني تاثيرلنديرميشدي. اصلینده قيرميزي باليق اونون گلمه سيني ايسته ييردي. چونکو قلبينده ساريجايلا باغلي درين دويغولار اويانميشدي. دوشونوردو کي، ساريجا اونون يانيندا اولسا اؤزونو داها دا گوجلو حيسس ائدر. بو اوزدن ده قيرميزي چوخ موتلو ايدي. قارا بولودلار آرتيق گليب دنيزين اوستونو سارميشدي. ائله قارانليق اولموشدو کي، گؤز-گؤزو گؤرموردو. ايکي دوست باليق بو سرت قارانليدا قاراجا باليغي قورتارما عمليياتينا باشلاديلار.

«ائروين» زينداني نين يئرلشديگي داغا تام اولاراق چاتميشديلار. ياواش- ياواش زيندانا طرف ديرماشيرديلار. زيندانين قاپيسيندا ايکي قوروماجي باليق دورموشدو. ايکي دوست باليق اؤنجه دن آنلاشديقلاري کيمي ائتديلر. ساريجا، قورويوجولارا ياناشيب «سالام آرييا باليقلار، من بو قارانليقدا يولومو ايتيرميشم. منه يارديمچي اولارسينيزمي؟» — دئدي.

آریا باليقلار بير-بيرينه باخيب اؤنجه شوبهه لنديلر. ساريجا اونلارا تام اولاراق ياخينلاشميشدي. آرييا باليقلارين قارشيسيندا نازليجا بير ياشيل باليق گؤرونوردو. اونلاردان بيري «آها نه قدر ده دوزلوجا گؤرونور بو ياشيل باليق» — دئدي. ياشيل گئييملي ساريجا باشلادي اونلارا ناز ائديب رقص ائتمه يه. ايکينجي آرييا باليق «ياشيل گؤزل، ايسترسن بو گئجه ني بيزيمله قال، يارين يولو گؤسترريک سنه.» — دئدي. ياشيل باليغا ياخينلاشيب توخونماق ايسترکن، چيگينلرينه سورعتله ايکي قيلينج سوخولدو. اينانيلماز بير سورعتله آرييا باليغين باشي بدنيندن آيريلدي. ايکينجي آرييا باليق ياشيل گئييملي قيرميزي باليغا سالديرماق ايسته دي. قيرميزي باليق قيلينجيني اونون بوغازينا داياييب قولاغينا «اؤلمک ايستميرسنسه سواللاريما دوغروجا جاواب وئر!» — دئدي.

آرييا باليق ديلي توتولا- توتولا دئدي: مني اؤلدورمه، بوتون سواللارينا دوغرو جاواب وئره جم.

قيرميزي باليق: قاراجا باليق هاردا اولور؟

آرييا باليق تيتره يه- تيتره يه دئدي: قاقا- قاقا، قاراجا باليق داغين آلتيندادير.

قيرميزي باليق: اورايا قدر نئچه يئرده قوروماجي وار؟

آرييا باليق: بيزيمله بير يئرده يئددي يئرده .

قيرميزي باليق: قوروماجيلارين کود سؤزلريني وئر.

آرییا باليق: «آرييا عيرقي نين يولوندا اينان

دگرسيز جانيمي ائدرم قوربان.»

قيرميزي باليق بو سؤزلري اوندان آلديقدان سونرا بير ووروشلا باشيني بدنيندن آييريب ساريجايا «يورو!» ايشارتي ايله يولونا داوام ائتدي. ايکينجي قوروماجيلار پوستونا چاتميشديلار. ساريجا داها آرخادان گليردي. ياخينلاشان قيرميزي باليغا قوروماجي آرييا باليقلاردان بيري «کيمدير؟»- دئيه باغيردي.

قيرميزي باليق «آرييا عيرقي نين يولوندا اينان

دگرسيز جانيمي ائدرم قوربان.» — سؤيله ديکدن سونرا اونون ياخينلاشماسينا ايذن وئرديلر. قيرميزي باليق اونلارا چاتار- چاتماز قيليجيني چيخاريب ايلديريم ساياغي ووروشلاري ايله ايکيسيني ده يئره سردي. بو شکيلده ايره ليله یيرديلر. قوروماجيلارين کود سؤزلريني بيلمه لري ايره ليله یيشلريني آسانلاشديرميشدي. باليقلار فورصت تاپيب يارديمچي گوج چاغيرا بيلميرديلر. قيرميزي ايله ساريجا سون انگله ياخينلاشديلار. کود سؤزونو دئديکدن سونرا قيرميزي باليق اونلارا ياخينلاشدي. بير ضربه ايله بيريني اؤلدوروب، ديگري نين ده بوغازينا قيلينجيني داياييب: «قاراجا باليق هاردادير، گؤستر! گؤسترمزسن آرخاداشين کيمي اؤله جکسن.» — دئدي. آرييا باليق داشلارلا هؤرولموش بير يئره ايشاره ائديب قاراجا باليغين اورادا اولدوغونو سؤيله دي. قيرميزي باليق بير ووروشلا سون قورويوجو آرييا باليغين دا باشيني بدنيندن آييردي. اونلار آرتيق قاراجا باليغي گؤره بيليرديلر. قاراجا باليق قارا داشلاردان هؤرولموش زيندانين ايچينده چارمیخا چکیلمیشدی. هر طرفیندن ایپلرله بؤیو بیر داشا ساریمیشدیلار. قيرميزي باليق ايره لي یه گئديب قيليجي ايله زيندانين قاپيسينا هؤرولموش انگللري ووردوب قيردي. ايچرييه گيرمک مومکون اولموشدو. قاراجابالیغین ساریلدیغی ایپلری ده قیلینجی ایله کسدی. قيرميزي و ساريجا باليقلار قاراجا باليغين اؤنونده ايديلر. قيرميزي باليق قاراجا باليغي گؤرمه نين هيجانيني ياشاييردي. اونون آچديغي يوللارا دوشوب گلميشدي چونکو. سانکي ديلي توتولموشدو. نه دانيشاجاغيني بيلميردي. قاراجا باليق باشيني قالديريب اونلارا باخدي. اؤنونده ايکي ياشيل باليق گؤروردو. «کيمسينيز؟» — دئيه سوردو.

بو زامان اونلار اوزَرلرينده کي ياشيل گئييملري چيخاريب اولدوقلاري کيمي قاراجا باليغين اؤنونده دوردولار. قاراجا باليق دقيق و آغير باخيشلاري ايله اونلارا باخيب «ساريجا، سني تانيديم. آنجاق بو قيرميزي کيمدير؟» — دئدي.

ساريجا: افنديم، قيرميزي سيزي گؤردويو اوچون هيجانلانميش و دانيشا بيلمير. گؤرورسونوزمو گؤزلريندن نئجه ياش آخير؟ ياخشيسي بودور کي، گئج اولمادان يولا دوشه ليم. دوشمن اوردولاري خبر توتمادان بوردان اوزاقلاشاليم.

قاراجا: سيز مني قورتاماغا گلميشسينيز دئمک!

ساريجا: ائله دير افنديم. لوطفا بيزيمله گلين!

قاراجا: آنجاق دون گئجه منه چوخ ايشکنجه وئرديلر. منه يارديم ائتمه سه نيز يئرييه بيلمرم.

قيرميزي باليغين سانکي گئرچکدن ده ديلي توتولموشدو. بير تک کلمه سؤز دانيشا بيلميردي. آنجاق بعضي ايشاره لرله نه ائتمک ايسته ديگيني آنلاتدي و قاراجاني چيگينلرينه آليب اوردان اوزاقلاشديلار.

***

آرييا باليقلار قاراجا باليغين قاچيريليشيندان شوک اولموشدولار. قاراجا باليغين زينداندان قاچيريلديغيني دويان باليقلاردا موباريزه عزمي ياراناجاقدي. اونا گؤره ده قاراجا باليغين قاچيريلديغيني گيزلين ساخلاماق ايسته ييرديلر. آنجاق دوشوندولر کي، گئج- تئز قاراجا باليق اؤزو اورتاليغا چيخاجاق. بو اوزدن ده قرارا گلديلر کي، قاراجا باليق آلديغي ايشکنجه لردن دولايي بو تئزليکده اورتايا چيخا بيلمز. قاراجا باليغين ساغاليب ساواشا گيرمه سيني انگلله مک اوچون اونو يئنيدن يارالي اولاراق ياخالاماغي پلانلاديلار. بوتون دنيزده خبر يايديلار کي، قاراجا باليغين يئريني بيلديرن باليق اؤدوللنديريله جکدير. قاراجا باليقدان خبر يوخ ايدي. باليقلار آراسيندا پيچيلتيلار، دئدي- قودولار دولاشير، قاراجا باليغين قهرمانليغي حاقدا افسانه وي شعرلر سؤيله نيردي. باليقلار قاراجا باليغين درحال اورتايا چيخيب آرييا باليقلارا قارشي موباريزه باشلاداجاغيني صبيرسيزليکله گؤزله ييرديلر. حتّی دنيزده آرييا باليقلارا قارشي کيچيک- کيچيک اعتيراضلار دا باشلاميشدي. فئرديس باليغين شعرلريني مسخره سؤزلر اولاراق بير- بيرينه دانيشيرديلار. قاراجا باليغين سيرلي بير شکيلده زينداندان قاچيريليشي قورخو کابوسونو داغيتميشدي. باليقلارين بير چوخو گيزلينجه اؤزگورلوک شرقيلري سؤيله يير و اؤز اونوتدورولموش رقصلريني اويناييرديلار. آرييا باليقلارا امر ائديلميشدي کي، آرتيق اسکيدن اولدوغو کيمي هر شئيه تاخيلماسينلار. چونکو قاراجا باليغين آزادليقدا اولماسي باليقلاري موباريزه يه هوسلنديره بيلر. دنيزده ماراقلي بير بکله یيش* وار ايدي. هم باليقلار بکله ييرديلر، هم ده آرييا باليقلار. فيرتينادان اؤنجه کي سسسيزليک. گونلر کئچدي، آنجاق قاراجا باليقدان خبر چيخمادي. قاراجا باليغين زينداندان قاچيريليشيندان بير آي کئچميشدي.

قيرميزي باليق ساريجا ايله بير يئرده قاراجاني چوخ اوزاقلارا آپارميشديلار. چوخ کيچيک بير آرخين دنيزه قوووشدوغو بير يئرده قاراجا باليق گيزليجه ياشاييردي. تام اولاراق ساغليغينا قوووشاجاغي گونه قدر قاراجاني بورادا بارينديرديلار. گون کئچديکجه قاراجا باليق ساغليغيني الده ائديردي. بير گون قيرميزي و ساريجا گؤردولر کي، قاراجا ائرکندن يوخودان اويانيب الينده بير قيلينج ايدمانلا مشغولدور. قاراجا باليغين احوال روحييه سي چوخ يوکسک ايدي. بو موددت عرضينده قيرميزي، قاراجا ايله صؤحبته باشلاميشدي. قاراجا باليق اوزون-اوزون ايدمان ائتديکدن سونرا اوزونو قيرميزييا توتوب «يوردوموزدان منه دانيش، آنام نئجه ايدي؟» — دئدي.

قيرميزي: يورددا ساغليقدير. آنانيز سيزين حصرتينيزده چوخ آغلادي. بير آز قوجالميش و سيزين دؤنوشونوزو گؤزله يير.

قاراجا: قيلينجيني آل گل مشق ائده ليم. قارشيميزدا بؤيوک ساواش بکله يير بيزي.

اونلار ساواشين ان سرت تئکنيکلريني مشق ائديرديلر. قيلينجلاري نين شاققيلتيسي اطرافداکي داغلاردا ائشيديليردي. مشق سيراسيندا قاراجا « بيليرسنمي قيرميزي؟ بعضن حياتدا اؤيله سينه اولايلار اولور کي، عدالتلي داورانماق چتينله شير. عدالتلي داورانيش بئله، بيريلري نين ضررينه اولور. اؤرنه یين من آنامي چوخ سئويرم. اونون اوزولمه سيني ايستميرديم. اونون آناليق ايچگودولريني* آنلاييرام. آنجاق اؤزومو او کيچيک موحيطين کولتورونه محکوم ائتمک حاققیم وارمي ايدي؟ خياليمدا باشقا بير حيات جانلانميشدي. اوزاقلارين خياللاري گليب ايچيمي دولدورموشدو. من اوزاقلاري فتح ائتمک اوچون دونيايا گلميشم دئيه دوشونوردوم. بو دوشونجه لر مني راحات بوراخميردي. بو اوزدن ده آنامين ايستکلرينه تسليم اولا بيلمزديم.

قيرميزي: حاقليسينيز. بلکه سيز فرقينده دئييلسينيز، آنجاق سيزين يولا دوشدويونوز گوندن اعتيبارن، يئني بير تاريخ ياراندي. باليقلارين خياللاري، دونياگؤروشلري کؤکوندن دگيشدي. آچديغينيز يولدا بير چوخ باليقلار يولچو اولدولار. چوخلاري دنيزه چاتا بيلمه ديلر. يوللارداکي تهلوکه لر اونلاري مغلوب ائتدي. آنجاق يئنه ده حرکت ايچينده، بللي بير هدف يولوندا اؤلدولر. من ده سيزين آچديغينيز يوللارلا گلديم. قاراجا افندي، آچديغينيز يول سادجه آرخلاردان، چايلاردان، گؤللردن، دره لردن، اوچوروملاردان کئچمه ميشدير. باليقلارين شعوروندان و روحوندان کئچميشدير. يولچولوغونوز بير دئوريم گئرچکلشديرميشدير.

قاراجا باليق: آنجاق بؤيوک ساواشلاريميز هله اؤنده دير. آرييا باليقلارلا ساواشا باشلامالي و بو دفعه بوتون دنيزي اؤز تاثيري آلتينا آلاجاق بير اينقيلاب گئرچکلشديرمه لي یيک. قيرميزي، سنين کيمي بير آرخاداشيمين اولماسينا چوخ سئوينيرم. سنين کيمي بير ساواشچي آرخاداشيمين اولماسي بؤيوک بير شانس. اگر بو اينقيلابي حياتا کئچيره بيلسک، سادجه دنيزده کي باليقلار دئييل، بيزيم دده لريميز، ننه لريميز کيمي اوزاقلاردا ياشايان باليقلارين دا حياتي دگيشه جک. چونکو دنيز بؤيوک بير مکاندير. بؤيوک مکانلاردا گئرچکلشن دگيشيکليکلر کيچيک مکانلاري دا اؤز ائتکيسي آلتينا آلير.

قيرميزي: من دنيزه سيزي دئييب گلميشم. سيزينله بير يئرده قاتيلاجاغيم ساواش منيم اوچون بير حئيثييت و شرف مسئله سي اولاجاق. بوتون گوجومله و اينانجيملا سيزينله بير يئرده ساواشاجاغام.

قاراجا: آرتيق منيم ساغليغيم يئرينده دير. ساريجاني دنيزه گؤندرمه لي یيک. دنيزده بوتون باليقلار توپلانمالي. آرييا باليقلارين عيرقچيليگيني اورتادان قالديراجاق بؤيوک ساواشا گيرمه دن اؤنجه باليقلارا قونوشاجام. بو ساواشي تکباشيميزا يوروتمه مه لي یيک. باليقلار دا قاتيلمالي بو ساواشا. چونکو بو ساواش اونلاري تنبلليکدن قورتاراجاق و يئني تاريخ ياراداجاق. بوتون گله جک تاريخلره اؤرنک اولاجاق بير اؤزگورلوک و قورتولوش ساواشي. بو اوزدن ده ساريجانين دنيزه اوغراييب بيزيم حاققیميزدا بيلگي وئرمه سي گره کير.

ساريجا: من بو ايشي بؤيوک ممنونييتله ائده جه یم قاراجا افندي.

قاراجا: زامان ايتيرمه يه ليم. سن همن دنيزه اوغرا و بيزيم آرييا باليقلارين ايقتيداريني دئويرمکده قرارلي اولدوغوموزو باليقلارا چاتدير. يارين گون اورتا واختي باليقلار دنيزين اورتاسيندا اولسونلار. ساریجا بالیق دنیزه یوللانارکن، قاراجا و قیرمیزی ساواش پلانلارینی حاضیرلاماقلا مشغول اولدولار.

***

گون اورتا واختي ايدي. بوتون باليقلار دنيزين اورتاسيندا توپلانميشديلار. آرييا باليقلار اؤنجه قالاباليغي انگلله مک ايسته ديلر. آنجاق گؤردولر کي، بو قدر ايزديحامي انگلله مک مومکون اولماياجاق، بوراخيب کناردان سئييرجي قالديلار. باليقلار صبيرسيزليکله قاراجانين گليشيني بکله ييرديلر. نفسلر توتولموشدو. قاراجا باليغين گليشيني دويوردولار. اؤنده قاراجا و آرخادا قيرميزي باليق گليرديلر. باليقلار قاراجانين جانينا بير خطر گلمه سين دئيه هر نؤوع فداکارليغا حاضير ايديلر. باليقلارين بو هيجانيني گؤرن آرييا باليقلار قاراجا و قيرميزي باليقلارين گليشيني انگلله مه ديلر. قاراجا باليق باليقلارين آلقيشلاري ايله ايزديحامين تام اورتاسيندا دوردو. باليقلارين يوکسک سسله آلقيشلاري داوام ائديردي. قاراجا باليقلا اونلارا سس سيز اولمالاريني سؤيله دي. باليقلار تام بير سس سيزليک ايچينده قاراجاني دينله مه يه حاضير ايديلر. «ائروين» زينداني نين اطرافيني ساران آرييا باليقلار دا سانکي قورخو ايچينده قاراجانين نيطقيني دينله مه يه تله سيرديلر. قاراجا باليق اؤنجه يوز مينلرجه باليقلارا ديقتله باخيب سونرا قونوشماسينا باشلادي:

باليقلار! باليق دوستلاريم، آرييا باليقلارين عيرقچيليک ائتديگيني بيليرسينيز. بو گئنيش دنيزي بيزلره دار ائتميش، باليقلارين حياتيني جهننمه چئويرميشلر. دنيزده ياشايان موختليف باليق جينسلري نين موسيقيسي، رقصلري ياساقلانميشدير. اؤزلري نين اوستون بير عيرقدن اولمالارينا اؤيله سينه اينانميشلار کي، دنيزده کي ديگر باليقلارين وارليقلاريني قبول ائتميرلر. آرييا باليقلارا گؤره طبيعت اونلاري آغا و يئرده قالان باليقلاري اونلارين کؤله سي اولاراق ياراتميشدير. بو ذهنييت باليقلارين اؤزگورلوکلريني قيسيتلاميشدير. اؤزگورلوک اولمايان يئرده حياتين هئچ بير معناسي اولماز. اؤزگورلوکسوز بير حيات اولماسا داها ياخشيدير. چونکو باليقلارين دوشونجه سينه، دويغولارينا ياساق گتيریلميشدير. بو ياساقلاري اورتادان قالديرمانين زاماني گلميشدير. من سيزي ديره نيشه چاغيريرام. آزادليغينيز يولوندا ساواشا چاغيريرام. بلکه آرييا باليقلار سيلاحلارينا گووَنه بيلرلر. آنجاق بيزيم يارديملاشماميز، دايانيشماميز اونلاري فيکرن و حيسسن مغلوب ائده جک. اونلار اينديدن فيکرن يئنيلميشلر. يئنيلمه سه يديلر بو بؤيوک توپلانتيني انگللرديلر. بو توپلانتي، بو دوستلوق گؤرونتولري آرييا باليقلارين فيکرن يئنيلديکلريني گؤسترمکده دير. دوستلاريم، «ائروين» زيندانيني اورتادان قالديرمالي و اورادا حبسده اولان بوتون باليقلاري آزاد ائتمه لي یيک. بيزيم آرييا باليقلارلا دوشمنليگيميز يوخدور. آنجاق فئرديس کيمي باليقلار اونلارين ذهنيني خسته فيکيرلرله دولدورموشدور. بو گون فئرديس باليقلا حسابلاشاجاغيميز گوندور. من قيرميزي باليق آرخاداشيملا بو ساواشا باشلاييريق. بيزيم آزادليق ساواشيميزا قاتيلماق ايسته ين وارمي؟

قاراجا باليغين بو آتشين نيطقي باليقلاري هيجانلانديرميشدي. بوتون باليقلار بير تک سسله «واااررر» — دئديلر.

قاراجا و قيرميزي باليق اؤنده، قالان باليقلار دا اونلارين آرخاسينجا «ائروين» زينداني يئرلشن داغا طرف حرکته باشلاديلار. آرييا باليقلارين ايقتيدار دایاناقلاری بو داغدا ايدي. بو حرکتي گؤرَن آرييا باليقلار تام ساواش حاضيرليغي دورومونا کئچديلر. ايکي جبهه بير- بيرينه ياخينلاشميشدي. قاراجا باليق «آرييا باليقلار، تسليم اولمانيزي و فئرديس باليغي گتيريب بيزه تسليم ائتمه نيزي ايسته ييريک. تسليم اولماسانيز هامينيز قيلينجدان کئچيريله جکسينيز.» — دئدي.

آرييا باليقلارين باشچیسی «قاراجا باليق، فئرديسي بيزيم جنازه لريميزين اوستوندن کئچه رک ياخالايا بيلرسينيز.» — سؤيله دي.

قاراجا باليق هوجوم امري وئردي. باليقلارين ساواشي باشلاميشدي. آرييا باليقلار سيلاح باخيميندان داها اوستون دورومدايديلار. قاراجا باليق سولدان، قيرميزي باليق ساغدان هوجوما باشلاميشديلار. آرييا باليقلاري قيرا- قيرا ايره ليله ييرديلر. قيرميزي باليق هر ايکي قيلينجي ايله ساواشاراق آرييا باليقلارين جبهه سيني ياريب ايکييه بؤلموشدو. قيرميزي باليغين آرخاسينجا دا باليقلار سوروسو آخين ائديردي. قيرميزي باليغين ساواشيني گؤرَن ساريجا يوکسک سسله « قهرمانيم منيم. قيرميزي باليق سني سئويرم. سنينله غورور دويورام. منيم اؤزگورلوکچو دوستوم.» — سؤيله دي. آرييا باليقلاردا روح دوشگونلوگو يارانميشدي. زامان کئچديکجه ساييلاري آزاليردي. آرتيق بير چوخ آرييا باليق تسليم اولماغا باشلاميشدي. تسليم اولانلاري آرخايا آليب، سادجه سيلاهلاريني اللريندن آليرديلار. «ائروين» زينداني يئرلشن داغ فتح ائديلميشدي. باليقلار دوستاق باليقلاري آزاد ائتديلر. داغ بوتونويله آرييا باليقلاردان بوشالديلدي. بو زامان داغين تام زيروه سيندن قاراجا باليغين «ياشاسين آزادليق!» هايقيريشي دويولدو. قاراجا باليق فئرديس باليغي اسير آلميش داغين باشيندا دورموشدو. ياشلي ياستي بورون فئرديس باليغين بوينو بوکولموشدو. بوتون باليقلار قاراجا باليغين اونونلا نئجه داوراناجاغيني گؤزله ييرديلر. قاراجا باليق اوزونو ميليونلارجا هيجانلي باليق سورولرينه توتوب دئدي: باليق دوستلاريم، فئرديس بالغين قارانليق ذهنييتي باليقلاري بير- بيرينه دوشمن ائتميشدير. سادجه بيزلره دئييل، آرييا باليقلارا دا ضرر وئرميشدير. مينلرجه باليق فئرديس باليغين خسته فيکيرلري اوزوندن حياتيني ايتيرميشدير. سيزدن سوروشورام. خسته فئرديس باليغين جزاسي ندير؟

بوتون باليقلار بير سسله «اؤلوم!» — دئديلر.

قاراجا باليق بير ضربه ايله فئرديس باليغين باشيني بدنيندن آييردي. فئرديس باليغين باشي داغين زيروه سيندن دره يه طرف يووارلاندي.

بوتون باليق تورلري اؤز رقصلريني اويناييب ماهني سؤيله مه يه باشلاميشديلار. موختليف باليق دسته لري اؤز ديللرينده بو ظفري قوتلاييرديلار. ساريجا دا قيرميزييا ساريلميشدي. ساريجا و قيرميزي قاراجايا ياخينلاشيب اونو تبريک ائتديلر. تام بو سيرادا دنيزده بير خبر دولاشدي کي، چوخ اوزاقلاردان بير ماوي باليق گلميشدير. ماوي باليق قاراجاني آختاريردي. ماوي باليغي قاراجانين يانينا گتيرديلر. قاراجا باليق اونون کيم و ندن هيجانلي اولدوغونو سوردو.

ماوي باليق دئدي: من چوخ اوزاقلاردان گلميشم. سيزي دئييب گلميشم. بيز کيچيک بير آرخدا ياشايان باليقلاريق. آرخا بير گورزه ایلان گلميش. هر گون اونلارجا باليغين حياتيني سؤندورور، جانيني آلير. بيزه يارديم ائده بيلرسينيزمي؟

قاراجا باليق قيرميزييا باخدي. ساریجا ایله بیر- بیرینه ساریلمیش گؤرونن قيرميزي باليق «من بو ساواشا گئتمه يه حاضيرام.» — دئدی.

بوندان سونراسي باشقا بير ماجرادير، باشقا بير يولچولوقدور...

‏2009‏/10‏/09

ساوالان